Na ad AVSplus - anc in stgars gea per l'economia verda

In cler na a l'iniziativa AVSplus ed in cler gea per la revisiun da la lescha dal servetsch secret. Quest trend è gia stà da vesair suenter l'emprim barometer da votaziun da la SSR, publitgà avant in mais. Auter tar l'iniziativa per in'economia verda. 51% sustegnan uss l'iniziativa dals verds.

Laschar ir video «Segund barometer da votaziuns dal gfs.Berna»

Segund barometer da votaziuns dal gfs.Berna

1:39 min, Telesguard dals 14.9.2016

Il tema ecologia fatschenta las Svizras ed ils Svizzers

Cler, en in pajais nua che mintga viertgel d'in jogurt vegn purtà el center da recicladi tutga il resguard per l'ambient tar il mintgadi. Ma cura ch'i vegn serius, sco per exempel tar l'iniziativa per in'economia verda, dat bain inqual la preferenza a l'atgna bursa. A questa conclusiun vegn era Martina Mousson da l’institut da retschertga gfs Berna:

«  Nus stuain forsa vairamain renunziar a tschertas chaussas per viver a moda ecologica. E qua n’èn ins betg dal tut segirs sche quai duai esser uschia. »

Avant in mais, a chaschun da l’emprim barometer, eran anc 61% per l'iniziativa. Quella pretenda da reducir ils proxims 34 onns l'impronta ecologica da la Svizra dad oz bunamain trais - sin ina terra. Oz sustegnan anc 51% questa finamira.

«  Quai ch’ins sto dir è che l’approvaziun iniziala era plitost in segn da simpatia per l’idea da l’iniziativa. Ussa han ils adversaris plazzà lur arguments e mussà tge che quai po muntar sch’ins vul realisar l’iniziativa e quai para d’avair gì effect. »

Martina Mousson quinta perquai cun in na a l'iniziativa.

Medem trend tar l'iniziativa AVSplus

Eran avant in mais anc 49% dals dumandads per in augment da las rentas d'AVS per 10%, èn actualmain mo anc 40% persuenter. Da l'autra vart è il dumber d'adversaris creschì sin 52%.

«  Quai che nus avain vis tar il segund barometer è che persunas sur 40 ed era persunas pensiunadas han midà maini. Els eran a l’entschatta per l’iniziativa. Ussa èn els sco ils giuvens cunter. »

Quai che fa surstar è che la decisiun da la cumissiun dal Cussegl naziunal da betg augmentar las rentas per 70 francs e da perfin metter en discussiun ina vegliadetgna da pensiun da 67 onns n’ha betg gì in effect sin il trend negativ.

«  La Svizra ha tegnì il flad per in amen cura che la cumissiun ha communitgà quai. Ma in effect n’ha quai betg gì. Quai n’ha betg gì l’effect che tuts han pensà ch’els stoppian ussa dir gea a l’iniziativa AVSplus per avair a la fin anc insatge. »

Revisiun da la lescha dal servetsch secret

Vinavant bain vesi ora per la revisiun da la lescha dal servetsch secret che vul dar a lez novas cumpetenzas da spiunar. Bain è il sustegn ì enavos da 58 sin 53%. Betg profità da quai han dentant ils adversaris che dumbran vinavant 35 pertschient. Creschì è il dumber da las persunas sin ballantscha.

RR novitads 17:00

La retschertga

Il segund trend da votaziun è vegnì realisà tranter ils 31 d'avust ed ils 8 da settember. L'institut gfs.berna ha dumandà 1'415 persunas. Il sbagl da prova è tar 2.7%. Las votaziuns federalas èn ils 25 da settember 2016.