GR: Betg dapli AVS, nagin’economia verda, dapli surveglianza

Las iniziativas «AVS plus» ed «economia verda» han fatg naufragi en il chantun Grischun. La lescha davart il servetsch d'infurmaziun è acceptada. Uschia n'ha la dumengia da votaziuns dals 25 da settember betg procurà per grondas surpraisas. Ina survista.

Laschar ir video «Discussiun «AVSplus» – oz ed en futur»

Discussiun «AVSplus» – oz ed en futur

7:58 min, Telesguard dals 25.9.2016

Cler na a dapli AVS

65,5% dals Grischuns e da las Grischunas han refusà l'iniziativa per in'AVS ferma. Quai èn stgars 6% en cumparegliaziun cun l'entira Svizra. Il pli cler na han ils votants e las votantas da l'Appenzell dadens mess en l'urna - bunamain 78% han ditg na.

Gea a l'iniziativa han sulettamain ditg las bleras valladas dal sid a partir dal Mesauc engiu. Grono, Leggia e San Vittore en las sulettas valladas dal sid che han ditg na. En il rest dal chantun han sulettamain Lon e Conters ditg gea.

«  Il resultat mussia che la populaziun Svizra na saja betg pronta da far experiments cun l'AVS. »

Stefan Engler
cusseglier dals chantuns


Cler na er a l'«economia verda»

Be trais da las 114 vischnancas grischunas han ditg gea a l'iniziativa che vuleva dapli persistenza en l'economia. Vuorz cun 42 cunter 39 vuschs. Lon cun 11 cunter 10 vuschs e Conters cun 25 cunter 24 vuschs.

Tut en tut han 69,6% refusà l'iniziativa per in'«economia verda» en il Grischun. Quai èn 6 % dapli che la media Svizra. Il pli cler na è vegnì dal chantun Sviz cun 78,5%.

Cler gea a dapli cumpetenzas per il servetsch d'infurmaziun

63,6% han ditg gea a la nova lescha dal servetsch d'infurmaziun. Set vischnancas han ditg na: Medel-Lucmagn, Vuorz, Buseno, Lon, Maton, Scharans e Rothenbrunnen.

Cumpareglià cun l'entira Svizra (65,5% gea) n'è il gea en il grischun betg uschè clers. Il pli cler gea a la lescha è vegnì dal chantun Vad cun 74%.

RR novitads 17:00