Siglir tar il cuntegn

Votaziuns federalas Midada da lescha d'asil vegn probablamain acceptada

Sche la populaziun avess gì da decider gia avant 10 dis davart ils projects da votaziun dals 5 da zercladur, lura avess quai dà in gea per la midada da la lescha d’asil e per il service public. Refusadas fissan vegnidas la finanziaziun gista dal traffic e l’entrada da basa nuncundiziunada.

Survista da l’emprim trend per las votaziuns: 2 x gea, 2 x na
Legenda: 2 x gea, 2 x na. Survista da l’emprim trend per las votaziuns che l'institut gfs.bern ha retschertgà per la SSR SRG. RTR

Sche la populaziun avess gì da decider gia avant 10 dis davart ils projects da votaziun federals dals 5 da zercladur, lura avess quai dà in gea per la midada da la lescha d'asil e per l'iniziativa «A favur dal servetsch public». Duas giadas na avess quai dà per l'iniziativa «Per la finanziaziun gista dal traffic» e per l'iniziativa «Per in'entrada da basa nuncundiziunada».

Gea a la midada da la lescha d’asil

La midada da la lescha d'asil dominescha las discussiuns enturn ils projects da votaziun dals 5 da zercladur. Aifer la populaziun giauda ella in grond sustegn. 59 pertschient dals dumandads han inditgà ch'els sustegnian la midada; cunter èn 30 pertschient.

La midada da la lescha d'asil pudess bain ir en vigur ils 5 da zercladur.
Legenda: In dals clers resultats fin uss: La midada da la lescha d'asil pudess bain ir en vigur ils 5 da zercladur. RTR

Claude Longchamp da l’institut da perscrutaziun Gfs Berna resta dentant precaut. Tar projects che vegnian da l'administraziun e dal parlament dettia quai adina ina tscherta malsegirezza. «I dat ina maioritad. Ed ins vesa era che l’argument da l’acceleraziun da las proceduras d’asil è fitg populars. Mo i dat era tschertas resalvas quai che pertutga las expropriaziuns.»

I saja perquai da spetgar che la polarisaziun tranter ils adherents ed ils adversaris da la midada da la lescha d'asil vegni a crescher.

Quai munta che la dretga, principalmain la PPS, vegn ad ir pli fitg envers il na, entant ch’il center e la sanestra vegnan ad ir plitost en direcziun dal gea. La finala èn quai la PLD e las persunas che n’èn betg liadas vid ina partida che decidan, sch’il resultat sa mova vers in gea ni vers in na.
Autur: Claude Longchampgfs.bern

Decisiv vegni tar quai tema era ad esser, co l'entira situaziun d'asil en l'Europa vegnia a sa sviluppar enfin la dumengia da votaziun. In eveniment emoziunal ni surprendent pudessi influenzar l'entira discussiun e perfin volver il trend actual, declera Longchamp.

Gea a l'iniziativa «A favur dal servetsch public»

Il mument ina maioritad chattass en tutta cas er l’iniziativa dal pievel «A favur dal servetsch public».

58% da las persunas dumandadas avessan ditg gea u plitost gea a l'iniziativa davart il service public.
Legenda: In resutat che fa surstar: 58% da las persunas dumandadas avessan ditg gea u plitost gea a l'iniziativa davart il service public. RTR

En la retschertga da Gfs sustegnan 58 pertschient dals dumandads l'iniziativa lantschada da pliras organisaziuns da consuments. 26 pertschient èn cunter.

Quai resultat fa surstar. En il parlament han ils iniziants chattà absolutamain nagin sustegn. Gnanc in soli sulet parlamentari ha votà per l'iniziativa. Ch'ella ha malgrà quai in tal sustegn da la populaziun declera Martina Mousson da Gfs cun la moda e maniera ch’ella è vegnida instradada.

L’iniziativa è fatga bain, ella porta in titel positiv. E cunter il service public n’è strusch insatgi.
Autur: Martina Moussongfs.bern

I vegnia dentant ad esser grev da salvar quella maioritad tar las votantas ed ils votants. «Anc n’èn betg bleras persunas sa decididas per ni cunter l’iniziativa. E quels che san gia tge votar n’èn anc betg dal tuttafatg persvas da lur posiziun.»

Ella giaja da quai anor ch'il dumber da persunas ch'èn cunter l'iniziativa vegnia a crescher las proximas emnas. La dumonda saja, quant grond che quai effect vegnia ad esser.

Cun la pretensiun ch'ils schefs da las Viafiers federalas svizras, da la Swisscom e da la posta na duain betg gudagnar dapli ch'in Cusseglier federal hajan ils iniziants actualmain anc in ferm argument per lur iniziativa.

Na a l'iniziativa «Per ina finanziaziun gista dal traffic»

In tal argument duvrassan era ils adherents da l'iniziativa dal pievel «Per ina finanziaziun gista dal traffic», l’uschenumnada iniziativa da la vatga da latg.

Cun 42% gea u plitost gea versus 37% na u plitost na n'è il resultat betg cler.
Legenda: La cursa n'è anc betg a fin. Cun 42% gea u plitost gea versus 37% na u plitost na n'è il resultat betg cler. RTR

Il mument sustegnan mo 42 pertschient l'iniziativa che vul che tut las taxas e taglias ch'ils automobilists pajan vegnian era mo duvradas per il traffic sin via. 47 pertschient vulan laschar il sistem sco el è oz. E quai trend negativ vegnia il pli probabel era a cuntinuar, di Lukas Golder da Gfs.

I duvrass anc ina midada fundamentala da la debatta, en direcziun d’ina votaziun da principi per ni cunter las vias, per ni cunter il traffic motorisà individual. Sche quai na schabegia betg, e qua avain nus indizis en questa direcziun, lura ha l’iniziativa paucas schanzas.
Autur: Lukas Goldergfs.bern

Contribui a quella situaziun difficila per ils iniziants haja era il gea da la populaziun al segund tunnel d'autos tras il Gottard la fin da favrer.Cun quai saja in dals gronds temas giud maisa e na possia betg vegnir duvrà per mobilisar las automobilistas ed ils automobilists. Exemplaric vesian ins quai en il Tessin, nua che mo 39 pertschient sustegnian il mument l'iniziativa.

Il resultat il pli cler datti per l'iniziativa davart in'entrada da basa senza cundiziuns.
Legenda: Cotschen dominescha. Il resultat il pli cler datti per l'iniziativa davart in'entrada da basa senza cundiziuns. RTR

Cler na a l'iniziativa «Per in'entrada da basa nuncundiziunada»

Tar l'iniziativa «per in'entrada da basa nuncundiziunada» mussa il barometer da votaziun in cler resultat. 72 pertschient dals dumandads vulan metter in na en l'urna, 24 pertschient in gea.

Referendum cunter la lescha davart la medeschina da reproducziun

E lura datti anc il referendum cunter la lescha davart la medischina da reproducziun. La conferenza da las schefredacturas e dals schefredacturs da la SRG SSR ha decidì da na far naginas retschertgas tar quai project.

L'argument è che las Svizras ed ils Svizzers hajan avant bun in onn gia detg cun 62% cleramain gea a la midada da la constituziun. La debatta davart la lescha saja sumeglianta ed ins sappia perquai ir da quai anora ch'il resultat vegni ad esser el medem rom.

Il studi

L'emprima retschertga sin incumbensa da la SSR SRG ha fatg l'institut da perscrutaziun gfs.bern tar 1'209 persunas cun dretg da votar en Svizra.

Las persunas tschernidas represchentativamain han respundì tranter ils 18 ed ils 23 d'avrigl 2016. Il sbagl da prova munta a +/- 2,9%.

RR novitads 17:00