Siglir tar il cuntegn
Inhalt

Votaziuns federalas L' iniziativa «Pro Service public» flaivlenta il servetsch public

Il Cussegl federal refusa l'iniziativa «Pro Service public». En realitad flaivlentia quella il service public perquai ch'il spazi d'agir da las interpresas pertutgadas vegnia limità, ha declerà la cussegliera federala Doris Leuthard avant las medias.

purtret da la fatscha da la cussegliera federala Doris Leuthard
Legenda: Doris Leuthard durant ina debatta en il Cussegl dals chantuns. Keystone

L'iniziativa pretenda tranter auter ch'interpresas liadas a la Confederaziun sco la Posta, la Swisscom u la SBB na dastgan betg vulair far gudogn. Vitiers na dastgan las pajas dals collavuraturs betg esser pli autas che questas da l'administraziun federala.

Davos l'inizitativa stattan pliras gasettas da consuments sco «K-Tipp», «Bon à savoir», «Spendere Meglio» u «Saldo».

La Svizra haja in service public fidabel che cuvria ils basegns dals clients, ha ditg Leuthard. El saja plinavant da gronda impurtanza per la coesiun naziunala. Tut quai ristgian ils iniziants da perder, senza numnar propostas concretas per meglierar il servetsch. Vitiers limiteschia l'iniziativa la libertad d'interpresa. La confederaziun ed ils chantuns perdessan plinavant considerablamain entradas. Per exempel ha la Confederaziun survegnì il 2015 da la Posta Svizra 200 milliuns francs dividendas.

Il pievel svizzer decida ils 5 da zercladur en chaussa.

RR novitads 15:00