Siglir tar il cuntegn
Inhalt

Votaziuns federalas Berset pledescha per in gea a la diagnostica da preimplantaziun

Ils 5 da zercladur decida il pievel svizzer schebain embrios producids en il vaider da reagenza dastgan vegnir intercurids avant che quels vegnan implantads a la mamma. Cusseglier federal Alain Berset è s’exprimì per in gea a la diagnostica da preimplantaziun.

Alain Berset durant sias explicaziuns avant las medias.
Legenda: Alain Berset ha accentuà che las premissas per la diagnostica da preimplantaziun sajan severas. Keystone

Las premissas sajan severas, ha Berset accentuà. L'onn passà aveva il pievel svizzer approvà ina midada da la constituziun che stgaffescha las premissas per la diagnostica da preimplantaziun. Uss vai per ina midada davart la lescha medicinala da reproducziun. Il cussegl federal ed il parlament vulan abolir quest scumond.

Parlament va pli lunsch

Oriundamain leva il cussegl federal be lubir la diagnostica a pèrs ch’èn purtaders da grevas malsognas ertaivlas, che na pon betg survegnir uffants senza la fructificaziun artifiziala.

Il parlament è però ì pli lunsch: La diagnostica duai er esser pussaivla per pèrs che na pon betg survegnir uffants senza la fructificaziun artifiziala. Tar quests pèr pon embrios vegnir intercurids sin cumponentas geneticas. Quest schlargiament saja ord vista dal cussegl federal absolutamain acceptabel, uschia Berset avant las medias.

RR novitads 12:00