Valposchiavo: Nov center da sanadad vegn

En avegnir èn l'ospital, la spitex e la chasa da tgira sut in tetg.

Poschiavo

Legenda da maletgs: La Valposchiavo fusiunescha l'ospital, la spitex e la tgira d'attempads RTR

Las vischnancas da Brusio e Poschiavo han ditg GEA al nov center da sanadad. Poschiavo cun 1157 encunter 92 vuschs e Brusio cun 309 encunter 34 vuschs. Grazia a la fusiun da l'ospital regiunal cun la spitex e la chasa d'attempads pon ins trair a niz sinergias, surtut en ils secturs da l'administraziun, da l'acquisiziun da material ed en il sectur dal persunal.

Agir avant da stuair reagir

Il nov center integrescha tut ils servetschs ch’èn gia avant maun ed unescha l’Ospedale San Sisto e la Casa Anziani. En in segund pass capita l’integraziun da la Spitex en l’organisaziun. La reorganisaziun duai garantir la cuntinuitad da la purschida da sanadad en la regiun tenor las directivas dal chantun Grischun.

Naginas plazzas na van a perder

Il nov project duai surtut permetter da pudair controllar ils custs en l'avegnir. Sco quai ch’il vicepresident dal cussegl da fundaziun da l’ospital, Donato Fanconi, ha ditg envers RTR na duessan ir a perder naginas plazzas da lavur cun ina fusiun da las organisaziuns ch’èn tuttas a Poschiavo.