Siglir tar il cuntegn
Inhalt

Votaziuns communalas San Murezzan duai sa participar a nova chasa da tgira

Sin l'areal Du Lac a San Murezzan duai i dar ina nova chasa da tgira. San Murezzan duai sa participar als custs da planisaziun.

San Murezzan
Legenda: Era San Murezzan vul sa participiar ad in project per ina nova chasa da tgira mad

Il cussegl communal da San Murezzan ha deliberà gievgia saira in credit da planisaziun da radund 2 miliuns francs per la nova chasa da tgira e d'attempads sin l'areal Du Lac a San Murezzan. En tut dovri radund 2.8 miliuns francs per la planisaziun dal project. Il rest dals custs surpiglian tenor ina clav da scumpart las ulteriuras vischnancas participadas al project: Silvaplauna, Segl e Puntraschigna.

Il credit da planisaziun duai finanziar la concurrenza d'architectura ch'i dovra ed era ils custs da planisaziun per il fabricat concret. La populaziun da San Murezzan vegn a votar ils 5 da zercladur davart il credit.

San Murezzan duai dir gea a la nova organisaziun turistica

Il cussegl communal da San Murezzan ha en pli deliberà per la votaziun dal pievel dals 5 da zercladur la proposta che era San Murezzan duai dir gea a la nova organisaziun turistica en Engiadin'Ota. Suenter ch'i na dat betg pli il circul sco purtader dal turissem vul ins fundar la nova societad d'aczias Engiadina San Murezzan Turissem. Tut las vischnancas da l'Engiadin'Ota ston votar davart la fundaziun da questa nova societad.

RR novitads 14:00