San Murezzan: Cler gea a segunda chasa da tgira

Cler gea al credit da planisaziun per ina chasa da tgira sin l'areal Du Lac a San Murezzan.

Laschar ir video «»

0:00 min, dals 11.12.2017

La populaziun da San Murezzan ha ditg gea cun 809 encunter 378 vuschs al credit da planisaziun da radund dus milliuns francs. Il credit cumpiglia passa 500'000 francs per la planisaziun da l'areal e passa 1,4 milliuns francs per la planisaziun da la chasa da tgira.

Il credit da planisaziun per la chasa da tgira munta totalmain a 2,3 milliuns francs. Il rest dals custs vegnan scumpartids sin las vischnancas partenarias per il project. Segl ha gia ditg gea a sia part dals custs. Puntraschigna percunter ha ditg na. Ussa manca anc la decisiun da Silvaplauna che decida ils 22 da zercladur davart il credit.

Signal per cuntinuaziun dal project

Il gea da San Murezzan è in signal per cuntinuar cun il project sin l'areal Du Lac, malgrà il na da Puntraschigna da glindesdi passà. Sigi Asprion, il president communal ed era president da la conferenza dals presidents da vischnanca da l'Engiadin'Ota, ha ditg envers RTR ch'ins veglia cuntinuar cun la planisaziun dal project sche era Silvaplauna di gea al credit da planisaziun ils 22 da zercladur.

Il gea da San Murezzan saja in signal cler che la populaziun da San Murezzan veglia ina segunda chasa da tgira.