Cuira: Dapli daners per la biblioteca

Cun 5'384 cunter 4'920 vuschs han vischinas e vischins da Cuira ditg «gea» a l'augment da la contribuziun annuala a la biblioteca da Cuira. Uschia è la via libra per ina biblioteca da Cuira centralisada.

Ina visualisaziun dad ina biblioteca en l'intern dal bajetg da la posta a la plazza da la Posta a Cuira. Ins vesa pitschnas maisas rodundas alvas cun sutgas alavs tiers. Il pantschieu su è alv cun ina structura da patgnas traisdimensiunala. Ord singuls chaums da la patgna splendurescha glisch. Davostiers hai retschas da regals da cudeschs. Blera glieud sa mova, stat e sesa en questa sala.

Legenda da maletgs: L'avegnir pussibel da la biblioteca da Cuira - uschia duess l'intern dal bajetg da la posta vesair ora cun la biblioteca centralisada. MAD Raumgleiter GmbH

Enfin qua gievan 490'000 francs ad onn a la fundaziun da la biblioteca da la citad. Nov vegn quest import pli che dublegià sin mintg'onn maximalmain 1,089 milliuns francs che la citad dat a sias bibliotecas.

Biblioteca centralisada «Gea» - però nua?

Il bajetg da la posta da Cuira a la plazza da la posta. Avant il bajetg parcheschan autos. Plontas cun feglia verda. In di da bell'aura. Be paucs nibels en il tschiel.

Legenda da maletgs: Forsa bain baud il da chasa da la biblioteca da Cuira centralisada. Keystone

Gia il mars aveva il parlament da Cuira approvà sin proposta dal cussegl da la citad da fusiunar las bibliotecas. Previs èsi da far la biblioteca en il bajetg da la posta. Per renovar las localitads ha il parlament da Cuira gia approvà in credit d'investiziun da 2,2 milliuns francs.

Segir n'èsi però anc betg, sche las bibliotecas dastgan vairamain midar chasa en il bajetg da la posta. In contract da locaziun cun la Crédit Suisse che posseda las localitads n'exista numnadamain anc adina betg.

In'ulteriura decisiun

Ultra da quai ha il suveran da Cuira approvà 6 fatschentas pertutgant la revisiun parziala da l'urden fundamental, quai cun mintgamai var trais quarts da las vuschs gea.