Cuira: Damain paja per il cussegl da la citad

Ils da Cuira reducescha las pajas da lur regenza sin 230'000 respectivamain 200'000 francs ad onn. Cun 6'411 cunter 3'853 vuschs ha il pievel approvà l'iniziativa.

Munaida svizra.

Legenda da maletgs: Daners pon cular vinavant senza limitaziun da 200'000 francs ad onn da la citad da Cuira a sia regenza. Keystone

L'iniziativa lantschada dal commember dal parlament da Cuira senza partida Beath Nay (anteriuramain PPS) è gartegiada. 62.5% da las vischinas e dals vischins da Cuira èn da l'avis che las pajas dals singuls cussegliers da la citad da Cuira na dastga betg surpassar ils 200'000 respectiv 230'000 francs per il president da la citad. Quai munta ina reducziun da paja da 20%, cunquai ch'il livel actual è tar 250'000 fin 260'000 francs ad onn.

Duess l'administraziun da la citad era survegnir pli pauc paja?

Tenor il president frestgamain reelegì Urs Marti duessan uss era las pajas en l'administraziun da la citad vegnir reducidas. Betg da quai avis è il collega en la regenza da Cuira Tom Leibundgut: Be il cussegl da la citad duai survegnir pli pauca paja. Quai di era l'iniziant Beath Nay.

Urs Marti ri en in microfon (propi in telefonin)

Legenda da maletgs: Urs Marti frestgamain reelegi sco president da la citad da Cuira na po betg propi rir dal tut. RTR, M. Decurtins

«  Uss èsi uschia, che divers emploiads han dapli paja ch'il Cussegl da la citad. A lunga vista n'è quai betg giustifitgà. »

Urs Marti
President da la citad da Cuira

Tut auter en il parlament communal

La decisiun dal parlament en chaussa era autra: Cun 17 cunter 21 vuschs avevan las cusseglieras communalas ed ils cussegliers communals decidì da recumandar a la populaziun da refusar l'iniziativa. Mo la fracziun da la Partida populara svizra (PPS) en il parlament da Cuira aveva votà per l'iniziativa.

L'iniziativa era vegnida inoltrada cun 802 suttascripziuns.

RR novitads 18:00