PPS Cuira rumpa l’allianza burgaisa

La partida populara da Cuira propona vinavant Hanspeter Hunger per il segund scrutini da las elecziuns per la suprastanza da Cuira e quai malgrà ch’el sez era sa retratg. Quai ha il president da PPS Cuira Mario Cortesi confermà ad RTR.

purtret da Hanspeter Hunger

Legenda da maletgs: Hanspeter Hunger, il candidat da la PPS che na candidescha uffizialmain betg pli. mad

La decisiun da Hanspeter Hunger da betg candidar per il segund scrutini haja procurà per discussiuns ier saira a la radunanza da la PPS da Cuira. E perquai proponia la partida da dar la vusch ad el ils 26 da zercladur.

Cunquai ha la partida midà opiniun: Pir glindesdi avevan tut las partidas burgaisas da Cuira annunzià da trametter Marco Tscholl (PBD) en la cursa sco cuntra-candidat da Patrik Degiacomi (PS).

Per il president dals burgais democrats, Christian Foidl, ha la partida populara uschia rut ina cunvegna. Sch'il suveran da Cuira elegia ils 26 da zercladur il candidat socialdemocratic Patrik Degiacomi, lura haja la PPS contribuì per ina buna part a quella elecziun. Er la presidenta dals cristian democrats, Catarina Ventrici, discurra dad ina cunvegna rutta. Ils cristian democrats veglian però inavant sa tegnair vi da la cunvegna, lur anteriur candidat Peter Portmann resta dimena or da la cursa.

RR novitads 14:00