Marco Tscholl candidescha per il Cussegl da la citad da Cuira

La suprastanza da la partida burgais democratica da la chapitala grischuna propona Marco Tscholl sco candidat. Il bab da famiglia s’engaschia per in ferm creschament da l’economia, scriva la PBD da la citad da Cuira.

Marco Tscholl candidat per il Cussegl da la citad da Cuira

Legenda da maletgs: Marco Tscholl candidat per il Cussegl da la citad da Cuira RTR, I. Orlik

Marco Tscholl è interprendider cun ina atgna interpresa. Uschia veglia el s’engaschar per in ferm svilup da l’economia, scriva la PBD Cuira. Tscholl è naschì a Cuira e viva anc oz en la citad. Per el è la citad da Cuira l’ideal lieu da viver cun sia famiglia.

Abitaziuns pajablas

L’iniziativa per abitaziuns pajablas è in tema ch’occupescha la populaziun. Ma l’iniziativa va cun las quotas fixas ina faussa via, ha ditg Tscholl a la conferenza da medias. Perquai s’engaschia el per la cuntraproposta che renconuschia il basegn ma che persequiteschia ina soluziun realistica e prudenta, ha ditg Tscholl.

Chasa da scola Ringstrasse

Da principi vul Tscholl che las chasas da scola da la citad èn situadas en lieus centrals e betg al ur da la citad. Chasas da scola centralas pon tranter auter recepir scolaras e scolars ord d’in radius pli grond che chasas da scola al ur.

Implants da sport Obere Au

Ina halla polivalenta en l’Obere Au na saja nagin tema suenter las votaziuns cleras cunter in tal project. Dentant saja il manco da capacitads tar las hallas da gimnastica in punct che na dastgia betg vegnir emblidà. Da tegnair en egl saja er in project per ina halla d’events che vegniss finanziada da terz, ha declera Tscholl a la conferenza da medias.

Enfin uss ha sulet la partida socialdemocrata mussà ambiziuns per il sez da Doris Caviezel-Hidber che ha demissiunà. La PS ha gia preschentà cun Patrik Degiacomi in candidat per la successiun da Caviezl-Hidber.

RR novitads 12:00