Siglir tar il cuntegn

Elecziuns Georg Ragaz (PBD) vul daventar suprastant da Domat

Georg Ragaz candidescha per in uffizi en suprastanza. Quai ha el confermà ad RTR. Enfin ussa n’ha la PBD nagin represchentant en la suprastanza ed il parlament da Domat. Georg Ragaz ha 52 onns, lavura sco cussegliader d’economia ed è il president da la PBD secziun «Plaun».

Eveline Widmer-Schlupf communabel cun Georg Ragaz.
Legenda: La nova commembra d'onur da la PBD, communabel cun il president da la PBD Plaun e candidat per la suprastanza da Domat. mad

Atgnamain avevan ins spetgà che la PBD na candideschia betg per la suprastanza, mabain pir per las elecziuns dal parlament da Domat (il november 2016). El haja survegnì bleras dumondas l’ultim temp, uschia ch’el saja ussa tuttina sa decidì da candidar per la suprastanza, ha Georg Ragaz declerà.

Georg Ragaz è naschì il 1964, lavura sco cussegliader d'econnomia e s'engascha dapi 20 onns activamain en la politica.

Cumbat per la suprastanza

Enfin ussa candideschan 6 persunas per ils 5 sezs en la suprastanza da Domat:

  • Erich Kohler (PCD, sulet candidat per il presidi)
  • Gabriela Aschwanden (PCD, suprastanta d’enfin ussa)
  • Armin Tanner (PCD, suprastant d’enfin ussa)
  • Silvia Bisculm Jörg (PS, candidata nova)
  • Daniel Meyer (PPS, candidat nov)
  • Georg Ragaz (PBD, candidat nov)

La Partida liberaldemocratica n’ha anc betg nominà ses candidats per las elecziuns communalas dals 5 da zercladur.

Eveline Widmer-Schlumpf commembra d’onur

La partida burgaisdemocratica dal chantun Grischun ha nominà l’anteriura cussegliera federala Eveline Widmer-Schlumpf sco commembra d’onur da la partida. Widmer-Schlumpf saja malgrà ses grond pensum sco cussegliera federala era adina stada pronta da sa gidar cun la partida locala la PBD Plaun, scrivan ils responsabels a las medias.