Domat: Erich Kohler suonda a Beatrice Baselgia

Erich Kohler da la PCD è il nov president da Domat. El era il sulet candidat per il presidi. En tut hai gì 7 candidats per 5 uffizis.

Erich Kohler, il nov president da Domat

Legenda da maletgs: Erich Kohler ha dumagnà l'elecziun. mad

Erich Kohler sa mussa cuntent cun l'elecziun, malgrà ch'el è stà il sulet candidat per il presidi da la vischnanca la quart gronda dal Grischun. Sco project impurtant per Domat numna Kohler il svilup da l'areal Vial/Tuleu, l'areal da l'anteriura resgia gronda a Domat.

Era elegì ha la populaziun da Domat la nova suprastanza communala che sa cumpona uss da:

Elecziuns a Domat - tgi ha survegnì quantas vuschs?

Candidat/avuschs
Erich Kohler, PCD
1264
Gabriela Aschwanden, PCD
897
Armin Tanner, PCD
891
Silvia Bisculm-Jörg, PS
845
Georg Ragaz, PBD
770
Daniel Meyer, PPS
632 betg elegì
Daniel Kunfermann Maissen, PLD
625 betg elegì

A l'elecziun dal president èn vegnids inoltrads 1'390 cedels da votaziun valaivels. L'absolut pli è stà tar 696 vuschs.

PLD perda plazza a la PBD

Per l’emprima giada è i gartegià a la PBD dad avair in commember en la suprastanza communala ni parlament da Domat. Cun 770 vuschs è Georg Ragaz vegni elegì cleramain. Cun uschia in bun resultat na vess gnanc Ragaz sez fatg quint. El è dentant cuntent da sentir il grond sustegn da la populaziun e sa legra ussa sin la lavur en la suprastanza communala.

Trumpà è percunter il giuven Daniel Kunfermann da la PLD. El ha cun 625 vuschs survegnì il pli pitschen sustegn. Quai malgrà ch’el sa mussa fitg activ en differentas uniuns a Domat. Kunfermann deplorescha d’ina vart che la PLD n'ha betg pudì defender la plazza vacanta dad Angela Casanova e da l’autra vart deplorescha el ch'ils abitants da Domat n'han betg dà ina schanza ad in dals dus candidats giuvens. Dasper Daniel Kunfermann n'è numnadamain era betg vegnì elegi il giuven candidat da la PPS Daniel Meyer.

Per il cussegl da scola da Domat èn elegids:

Cussegl da scola da Domat

Candidat/a
vuschs
Denise Flury
1031
Mario Beer
967
Simon Diener
883
Hermy Vruwink
735

RR novitads 13:00++