Siglir tar il cuntegn
Inhalt

Elecziuns Be plan B en il cumbat per il sez en il cussegl da la citad

Cunquai ch'i n'ha betg tanschì per in candidat communabel provan las partidas burgaisas pbd, pld e pcd da cuntascher il sez da Doris Caviezel-Hidber cun ina recumandaziun d'eleger.

recumandaziun d'eleger en las broschuras per il cumbat electoral da la PBD, PCD e PLD
Legenda: La recumandaziun d'eleger è da chattar en las broschuras per il cumbat electoral da las trais partidas PBD, PCD e PLD. RTR, G. G. Flepp

I fiss stà in grond success sche las partidas burgaisas avessan chattà in candidat communabel, ha ditg Simon Schwegler, il president da la partida liberaldemocrata da Cuira.

Tant pli che la PS saja vegnida fitg spert cun Patrick Degiacomi sco ses successur per Doris Caviezel-Hidber.

Christian Foidl (BDP), Caterina Ventrici (PCD) e Simon Schwegler (PLD)
Legenda: Da san.: Christian Foidl (BDP), Caterina Ventrici (PCD) e Simon Schwegler (PLD) han informà davart la collavuraziun. RTR, G. G. Flepp

Far il meglier ord la situaziun

Empè d'in candidat communabel comunitgeschan las trais partidas PBD, PLD e PCD en in'infurmaziun communabla, da recumandar d'eleger ad

  • Urs Marti, liberaldemocrat e president da la citad
  • Marco Tscholl, burgaisdemocrat
  • Peter Portmann, cristiandemocrat

Plan B senza la PPS

Malgrad che la recumandaziun è be la segund megliera varianta e che la quarta partida burgaisa, la PPS, na fa betg part da la recumandaziun d'eleger, è Simon Schwegler loschs. Loschs, d'avair cuntanschì almain questa collavuraziun tranter las partidas burgaisas.

Tar tut las autras activitads en il cumbat electoral, saja quai occurenzas ubain sedutas en cass d'in segund scruttini, fetschia la PPS dentant era part, uschia Schwegler vinavant.

Las partidas burgaisas da Curia tiran pia vid la medema suga en il cumbat per ils sez dal cussegl da la citad, la victoria vul dentant tuttina mintgina per sa sezza cun l'agen candidat.