Siglir tar il cuntegn

Elecziuns 7 candidats per 3 posts da suprastanza a Cuira

Tut las partidas sa participeschan al cumbat per in sez en la suprastanza da Cuira. Quai èn per l'ina ils dus actuals Urs Marti (PLD) e Tom Leibundgut (Glista libra) e 5 candidats che vulan da nov far part a l'executiva.

Sin il maletg ves'ins ina survista sin la citad da Cuira.
Legenda: La citad da Cuira RTR/ fb

Ils dus actuals han in bonus

Urs Marti (PLD) e Tom Leibundgut (Glista libra) han l'avantatg d'esser enconuschents tar votantas e votants. Els han bunas schanzas da vegnir elegids per in'ulteriura perioda ils 5 da zercladur.

La PS en la pole position

Il candidat socialdemocratic Patrik Degiacomi ha lantschà sco emprim sia candidatura, gia il november cura ch'igl è vegnì enconuschent che la suprastanta actuala Doris Caviezel-Hidber chala.

Quai pudess esser in avantatg per il cumbat, cunquai ch'el ha uschia dapli temp per far enconuschent sia persuna e sias posiziuns. Plinavant è la Partida socialdemocratica tradiziunalmain ferma en la chapitala grischuna.

Blers candidats burgais

Las partidas burgaisas da Cuira n'èn betg sa cuvegnidas sin in candidat communabel e preschentan mintgamai in agen candidat:

  • Marco Tscholl (PBD)
  • Peter Portmann (PCD)
  • Hanspeter Hunger (PPS)
  • Salome Mathys (PVL)

Il privel è cunquai grond che las vuschs burgaisas vegnan sparpagliadas sin plirs candidats e ch'i na basta betg per in mandat en la suprastanza da Cuira. Sch'i dovra dentant in segund scrutini lura pudessan ils burgais sa concentrar sin in candidat ed uschia cumbatter communablamain cunter la PS.