Siglir tar il cuntegn

Elecziuns 5 candidats per 4 sezs

1 candidata e 4 candidats van en il cumbat per ils 4 sezs en la suprastanza da Tavau, il «Kleiner Landrat». I dat pia sco gia avant 4 onns in cumbat electoral. La votaziun è ils 5 da zercladur.

la suprastanza actuala ed ils candidats novs
Legenda: Ils 5 da zercladur elegia il suveran da Tavau la nova suprastanza. mad / RTR

Dasper il post da president, il landamma, che vegn actualmain occupà da Tarzisius Caviezel, datti 4 ulteriuras persunas en l’executiva da Tavau. 5 persunas avessan gust sin ils 4 posts. Dals suprastants actuals vulan ils suandants restar en uffizi: «Kleiner Landrat»

  • Simi Valär da la PLD
  • Stefan Walser da la PS
  • Herbert Mani da la PBD

Reto Dürst che n’appartegn betg ad ina partida na stat betg pli a disposiziun.

Plinavant vulan 2 persunas vegnir da nov en suprastanza:

  • Valérie Favre-Accola da la PPS
  • Walter von Ballmoos da la PVL

La secretaria da la PPS Grischun Valérie Favre-Accola vul far directamain il pass en la suprastanza. Quai senza esser stada avant en il parlament da Tavau, il «Grosser Landrat». Ella na vesa dentant betg quai sco dischavantatg. Ella haja avunda experientscha politica, uschia Favre-Accola.

Walter von Ballmoos ha gia experientscha en il parlament da Tavau ed è er en il Cussegl grond. El è gia stà avant 4 onns candidat per la suprastanza da Tavau. Lura aveva el gì in bun resultat e cuntanschì il pli absolut. Per l’elecziun n’avevi dentant betg tanschì.

Simi Valär ed il «cas Rega»

Per il suprastant actual e candidat Simi Valär è la dumonda, sche las discussiuns enturn la basa da la Rega a Tavau èn in dischavantatg per el en l’elecziun. La basa vegn actualmain bloccada da possessurs dad in mises en la vischinanza. La tegia è en ils mauns dad ina cuminanza d’ertavels, tar quella tutga era Simi Valär.