Siglir tar il cuntegn

Header

cuntegn

Vaccin alternativ Emprimas vaccinaziuns cun Johnson & Johnson a Cuira

A Cuira vegn vaccinà da nov cun il vaccin Janssen da Johnson & Johnson. En il decurs da l'emna datti il vaccin er en ils ulteriurs centers da vaccinar en il Grischun. Enfin uss stattan a disposiziun 3'450 dosas dal vaccin vectorial, ch'è in'alternativa als vaccins da mRNA. Per survegnir il vaccin da Johnson & Johnson dovri in'annunzia online, scriva il chantun. Enfin uss sajan 400 persunas s'annunziadas.

Alternativa a vaccin mRNA

Il vaccin vegn recumandà a persunas sur 18 onns che na pon betg sa laschar vaccinar cun in vaccin mRNA pervia da motivs da sanadad ubain persunas che refusan quella varianta. Questa squitta na vegn perencunter betg recumandada a dunnas en speranza e persunas cun in sistem d'immunitad supprimì.

Grond interess vid Janssen en il chantun Tessin

Extraordinari grond saja l'interess per il vaccin alternativ stà en il chantun Tessin, sco la media chantunala Marina Jamnicki ha declerà envers RTR.

audio
Marina Jamnicki: «Il chantun Tessin ha 6'000 persunas che vulan Johnson & Johnson»
ord RTR Audio dals 08.10.2021.
laschar ir. Durada: 19 Secundas.

Il spezial dal vaccin da Johnson & Johnson è ch'i dovra be ina squitta. En Svizra na datti actualmain nagina fulla da dumondas per il vaccin da Johnson & Johnson. Tenor ils chantuns è la maioritad da las dosas che la Confederaziun ha a disposiziun anc en ils magasins.

Paucas dumondas

Il chantun Vad ha survegnì durant las emprimas 24 uras var 400 dumondas. Medem vesa la situaziun or en il chantun Turgovia. En auters chantuns è il dumber d’annunzias anc pli bass. La campagna per il vaccin da Johnson & Johnson è vegnida lantschada ier. La Confederaziun ha radund 150’000 dosas dal vaccin. Quellas duain star a disposiziun a persunas che na pon betg sa laschar vaccinar cun ils vaccins da Pifzer/Biontech e Moderna, u han resalvas cunter quels.

Ord l'archiv

Dovra quai propi ina concurrenza? U fissi forsa meglier da collavurar sur cunfins chantunals e naziunals?

video
Tgi è pli svelt?
Or da Giuventetgna dals 27.01.2021.
laschar ir. Durada: 1 minuta 36 Secundas.

RTR novitads 18:00

Artitgels legids il pli savens