Siglir tar il cuntegn

Header

video
Da Mustér a Müstair: Livio Foffa e ses chaun sin ina missiun speziala
Or da sil punct dals 03.08.2022.
laschar ir. Durada: 2 minutas 13 Secundas.
cuntegn

Tras vitgs, vals e sur pizs Ina giada travers il Grischun – igl è dumagnà!

Per gronda part a pe, ina u l'autra giada cun l'auto da posta e tren, en la bartga u sin il chaval, fan ils trais umens ed il chaun viadi da Mustér a Müstair. L'entschatta è stada tar la claustra da Mustér e la finamira da cuntanscher en otg dis ed otg etappas la claustra Son Jon a Müstair.

L'arrivada a Müstair è stada in dals puncts culminants per Livio Foffa. Là è el vegnì beneventà d'amias ed amis ch'el enconuscha ed ha gì plaschairun suenter ils 250 km e var 15'000 meters d'autezza. In dals puncts ch'è stà plitost negativ, saja stà ch'i hajan adina gì plitost in zic retard ed hajan stuì far savens prescha. Ma ils highlights sajan definitivamain stads bler pli numerus. Las entupadas cun la glieud sin viadi sajan stadas uschè cordialas, ma er ils discurs davos las culissas cun Curdin Fliri e Roman Schmid sajan stads grondius. Definitivamain sajan dentant las cuntradas da bellezza stadas grondiusas, sco er la levada dal sulegl ma er dad ir a chavaltgar.

audio
Ils highlights e lowlights da Livio Foffa
ord Actualitad dals 09.08.2022.
laschar ir. Durada: 4 minutas 59 Secundas.

Qua sut vesais vus anc ina giada las staziuns ch'il quartet ha fatg durant ils 8 dis da viadi.

La davosa etappa è dumagnada

Livio raquinta en ses rapport quotidian anc ina giada da la bella surpraisa ch'els han entupà l'anteriur moderatur da SRF Nik Hartmann il settavel di, ch'ha lura er accumpagnà els in toc. Nik Hartmann ha fatg da quellas aventuras cun ses chaun gia bleras giadas. Il davos di da l'etappa è la finamira d'arrivar a Müstair. La notg han els durmì a San Jon, il plan per il di è dad ir in toc a chaval ed il davos toc a pe fin a Müstair. Per Livio è quai in dals puncts culminants perquai ch'el arriva en sia patria, nua ch'el è creschì si.

La saira han lura amias ed amis beneventà il quartet a Müstair. Cun quai è ì a fin il viadi dad 8 dis da Mustér a Müstair. Da vesair datti lura dapli da l'aventura da Livio e Louis cun Roman e Curdin en dus Cuntrasts. Quels vegnan emess ils 28 d'avust ed ils 4 da settember a las 17:25 sin SRF 1.

audio
Da Mustér a Müstair: la davosa etappa fin Müstair cumenza
ord Actualitad dals 08.08.2022.
laschar ir. Durada: 5 minutas 57 Secundas.

River rafting per arrivar a Chapella

La saira avant èn els arrivads a l'Open Air Chapella ch'ha propi plaschì a tuts ed e stà ina buna finiziun dal di. viadi da Chapella fin a San Jon han els pudì scursanir il viadi sur l'aua. Davent da Susch fin Ardez han il trais umens dastgà far River Rafting che saja stà ina belleza experientscha. Il chaun Loui dentant n'ha betg participà a questa aventura, lez fiss stà memia bler stress per el. Il colleg Severin ha guardà dad el durant quest temp. Durant il discurs cun Livio era il quartet al Lai Nair. A Tarasp han els entupà l'anteriur moderatur Nick Hartmann dad SRF, ch'ha accumpagnà els fin il Lai Nair.

audio
Da Mustér a Müstair: Scursanir il viadi cun River Rafting da Susch fin Ardez
ord Sport ed actualitad dals 07.08.2022.
laschar ir. Durada: 9 minutas 6 Secundas.

Finalmain far la duscha suenter quatter dis

Suenter avair durmì giuadora ed esser ì tras il tunnel da l'Alvra hai lura finalmain dà ina duscha. Quai è stà in dals highlights dal 5avel di. L'etappa 6 è dentant ina in zic pli patgifica, i va da Bever a Chapella ed els na fan betg tants meters d'autezza. Las vaschias da Curdin fan anc adina mal, ma igl è da restar ferm ed el ignorescha ellas. Il barbagiat han els cunzunt sentì ils emprims dis. Uss saja quai dentant in zic passà.

audio
Da Mustér a Müstair: Roman e Curdin rapportan da lur vista
ord Actualitad dals 06.08.2022.
laschar ir. Durada: 9 minutas 46 Secundas.

Di 5: da la Chamona Ela enfin a Bever

Il tschintg'avel di ha manà il quartet dal Grischun Central en l'Engiadina. Auter che planisà han Livio e ses cumpogns dentant fatg il viadi tras il tunnel da l'Alvra. Planisà era dad ir suravi. Loui è probablamain l'emprim chaun che ha pudì traversar uschia il tunnel. Discurrì ha Livio er davart il tema impurtant dals dretgs chalzers. Ma betg be il chalzer è impurtant. El ha pudì schliar ses problems cun ils pes entras ina buna socca. In tip che renda forsa ina giada in'emprova.

audio
Il 5avel di da viadi hai dà da vesair il tunnel d'Alvra empè da bellas cuntradas
ord Actualitad dals 05.08.2022.
laschar ir. Durada: 7 minutas 49 Secundas.

Il quart di è stà dir

Gievgia èn ils umens da viadi da Ziteil fin la Chamona d'Ela. Per Curdin vegni dentant plaunet in viadi dolurus. El ha survegnì vaschias vi dals pes, dentant morda el sin ils dents e va vinavant. Er il chaunin Loui fatschenta Livio. El saja bain fittischem, dentant haja el in zic mal vi d'ina toppa. Suenter ina visita tar la veterinaria, dat quella dentant l'OK. Per Loui saja quai ina vita da siemi, el fiss probabel permalà sch'el na pudess betg cuntinuar il viadi.

Ma dasper ils quitads datti er highlights durant il di. En il guaud ha Livio inscuntrà Astrid Thurner. Ella è droghista e declera als umens las ervas medicinalas e quellas per mangiar. Da mezdi fan els lura in bun risotto cun las ervas.

audio
Da Mustér a Müstair: Durant il quart di cumparan ils emprims mals
ord Actualitad dals 04.08.2022.
laschar ir. Durada: 7 minutas 3 Secundas.

Sin il Piz Beverin – il terz di cumenza baud

Tschanà han els in bun risotto, lura han Livio, Loui, Roman e Curdin durmì sut tschel avert. Durmì n'han els betg bler. Livio ha gì da parter il satg da durmir cun Loui ed il plaz è uschia stà in zic limità. Ma, il dasdar baud ha rendì. La levada dal sulegl sin il Piz Beverin, definitivamain in'experientscha che vala la paina. Er il viagiar da notg è stà in eveniment tut spezial. Finamira dad oz è dad arrivar fin a Ziteil.

audio
Da Mustér a Müstair: Il terz di èsi ì vess da vegnir or dal satg da durmir
ord Actualitad dals 03.08.2022.
laschar ir. Durada: 11 minutas 32 Secundas.

Il segund di e la punt da stgarpitsch

La via maina Livio e sia cumpagnia oz atras la Lumnezia. Gia curt suenter l'entschatta hani gì la sfida da traversar in flum – la punt n'era betg pronta per duvrar. Grazia a Guido Derungs hani pudì evitar da stuair returnar ils 250 meters d'autezza a Degen. Il di cuntinuescha lura sur il Güner Lückli en Val Stussavgia e sin il Glaspass survegnan Livio, Curdin e Roman alura il material per bivacar questa saira.

audio
Da Mustér a Müstair: Il segund di ha cumenzà cun in pitschen schoc
ord Actualitad dals 02.08.2022.
laschar ir. Durada: 5 minutas 58 Secundas.

L'emprim di ha cumenzà bain

Bler sulegl ed in tschiel blau – la partenza era glindesdi a las 06:00 tar la claustra a Mustér. L'emprima surpraisa ha era gia spetgà Livio Foffa avant la claustra. Avat Vigeli ha surdà ad el in regal per las mungias da la claustra da Müstair, ch'el po surdar il davos di. Quest di vai anc sin la chamona Terri. Per lez dastgani ir in in pau cun il bus alpin. Suenter vai vinavant sur il pass Diesrut e vegnan lura or a Vrin, nua ch'ils trais umens dorman l'emprima notg.

audio
Da Mustér a Müstair: l'emprim di ha cumenzà bain
ord Actualitad dals 01.08.2022.
laschar ir. Durada: 4 minutas 49 Secundas.

Mintgamai il prim «selfie» cun Livio gudogna

Avrir la box Serrar la box
Legenda: Quest «satgados RTR» cun inqual chaussetta per ina viandada datti da gudagnar. Mintgamai ina schanza per di. RTR, Flavio Deflorin

Mintga di da lur tura ha insatgi la schanza da gudagnar in «satgados da RTR» emplenì cun chaussettas ch'ins po tranter auter er duvrar sin ina tura da viandar.

Tut quai che Vus stuais far: Esser l'emprim u l'emprima dal di che trametta ina fotografia da sasez cun Livio Foffa ch'è da viadi. Quai via Whatsapp sin il numer: 079 200 70 07. Il meglier gist cun il lieu d'inscunter e Vossa adressa postala.

Indizis nua ch'els sa chattan datti

  • al radio,
  • en la tabella cun las etappas e rutas,
  • e sin la charta dal livetracker.

La saira avant la gronda tura

Ils satgados èn preparads ed ils trais umens pronts da partir. La saira avant èn ils viandants èn in'hotel a Mustér e giaudan anc ina buna tschaina avant la gronda aventura. Livio Foffa sa legra gia fitg ma è era in zic gnervus. Glindesdi cumenza il viadi tar la claustra a Mustér. Sco el raquinta èsi planisà da partir gia las 06:00. I n'è betg mo planisà da durmir en hotels ils proxims dis ma era en chamonas u schizunt en tenda, nua che cunzunt l'aura pudess far stritgs tras ils plans, ma per ils proxims dis è la prognosa anc buna.

audio
Da Mustér a Müstair: La saira avant la gronda aventura
ord Sport ed actualitad dals 31.07.2022.
laschar ir. Durada: 10 minutas 54 Secundas.

Il plan

Sin lur viadi d'in chantun a l'auter atras il Grischun inscuntran els indigens, pli u main prominents, ed i spetgan tant surpraisas sco sfidas. Saja quai l'aura che po adina far in stritg atras il plan dal di, trutgs e sendas pretensiusas sin via tar chamonas u pizs. U lura er l'entir equipament cun cameras, accus ed il pli necessari per il mintgadi sin tura che sto vegnir purtà si dies. La devisa è numnadamain: ir a pe. Seser en l'auto da posta ubain en il tren dastgan els be singulas giadas. E forsa ch'in u l'autra ha in zic cumpassiun e lascha seser els in toc sin il char da fain u en l'auto. Uschia vai tras vitgs e vals, sur pizs e collinas a travers il Grischun.

audio
Da Mustér a Müstair: Livio Foffa davart la spassegiada che spetga
ord Actualitad dals 29.07.2022.
laschar ir. Durada: 10 minutas 40 Secundas.

L'entir viadi, tut ils inscunters e las aventuras da Livio, Curdin, Roman ed il chaun Loui datti lura da vesair a la televisiun. Quai sco Cuntrasts en duas parts. La prima, ils 28 d'avust e las segunda ils 4 da settember, mintgamai dumengia a las 17:25 sin SRF1 ubain sin rtr.ch u Play RTR.

Las etappas e nua ch'ellas mainan atras

Etappa Ruta (po variar tut tenor aura u autras surpraisas)
1. Mustér – Vrin (01-08) - Partenza a Mustér (claustra da Mustér)
- Val Sumvitg
- Chamona dal Terri
- Vrin
2. Vrin – Glaspass (02-08) - Uors
- Güner Lückli
- Val Stussavgia
- Glaspass
3. Glaspass – Ziteil (03-08) - Piz Beverin
- Pignia
- Bavugls
- Ziteil
4. Ziteil – Chamona d'Ela (04-08) - Radons
- Savognin
- Pass digls Orgels
- Chamona d'Ela
5. Chamona d'Ela – Bever (05-08) - Bravuogn
- Preda
- Spinas
- Bever
6. Bever – Chapella (06-08) - La Punt
- S-chanf
- Chapella (a l'openair)
7. Chapella – San Jon (07-08) - Cinuos-chel
- Susch
- Tarasp
- San Jon
8. San Jon – Müstair (08-08 - S-charl
- Tamangur
- Piz Terza
- Müstair (claustra San Jon)

RTR actualitad 11:00 +

Artitgels legids il pli savens

Scrollar a sanestra Scrollar a dretga