Siglir tar il cuntegn

Header

cuntegn

Tavau Rempars da lavinas vegnan engrondids

Ils rempars da lavinas «Frauentobel» a Tavau vegnan engrondids. La regenza ha approvà il project e sustegna quel cun ina contribuziun da maximalmain 2,4 milliuns francs. Ultra da quai vegn approvada ina contribuziun supplementara da bunamain 74'000 francs tenor la Lescha davart las vias.

Dapi il 2011 èn vegnids installads en la part davos dal Frauentobel quatter indrizs fixs per siglientar lavinas. Cunquai che quests indrizs èn sa cumprovads, vegn ussa planisà il medem sistem per la part davant dal Frauentobel. Il potenzial da donns è considerabel er en la part davant da la val. Ultra dal territori d'abitadi èn pertutgadas la via chantunala sco er – sche las lavinas èn fitg grondas – la Viafier retica.

Il project prevesa da construir 13 retschas da rempars da lavinas permanents d'ina lunghezza totala da 770 meters. En l'areal Staflermeder Sid èn planisadas supplementarmain duas retschas da rempars da lavinas temporars da 213 meters sco er emplantaziuns da guaud. Il project vegn realisà en trais etappas e custa totalmain 3,2 milliuns francs.

Protecziun cunter crudada da crappa a Puschlav

En pli ha la regenza dà glisch verda al project da protecziun cunter crudada da crappa «Robbia» a Puschlav. Ella ha deliberà ina contribuziun da maximalmain 742milli francs.

En il rom dal project duain vegnir protegids l'areal da l'ovra electrica Robbia e la parcella cunfinanta da la Swissgrid SA sco er il conduct da pressiun cun tut en tut quatter raits cunter crudada da crappa. Ils custs totals importian 990milli francs. Il project duaja esser terminà l'auter onn.

Paraid crap a Puschlav
Legenda: Chantun Grischun

RTR novitads 09:00

Artitgels legids il pli savens