Glindesdi saira ha in motociclist pers la controlla da ses töf ed è collidà cun in mir sin la via principala tranter Tagn/Wiesen e Tavau. Tar la crudada è l'um da 23 onns lura sa glischnà sin ils binaris da tren gist sper via. Il tren che vegniva, ha malgrà ch'el ha franà immediat laschà pigliar il töffist. Quatras è el sa blessà grevamain vid las chommas. Uschia scriva la Polizia chantunala dal Grischun.
La Rega ha sgulà l'um en l'Ospital chantunal a Cuira. Per radund ina ura e mesa è la Via da la Landwasser vegnida serrada ed il traffic da tren è stà interrut. Pervia da la collisiun cun il tren è vegnì infurmà il Servetsch svizzer d'inquisiziun da segirezza SUST. Ensemen cun la Procura publica dal chantun Grischun intercurescha la Polizia chantunala grischuna co igl è vegnì a l'accident.