Siglir tar il cuntegn
Inhalt

SwissSkills2018 Las candidatas ed ils candidats

Bun 900 candidatas cumbattan dals 12 fin ils 16 da settember en 75 professiuns per il titel da campiun svizzer en lur professiun. Tranter quels èn era 23 Grischunas e Grischuns en las pli differentas professiuns.

Da l'electroinstallatura, sur il pasterner u la pura, fin tar spezialists da transports sin via u da products da charn ed anc bleras autras professiuns – els tuts cumbattan per daventar il meglier u la meglra da la Svizra. Tranter els èn er plirs candidats e candidatas rumantschas. Ad els ed ellas guardain nus natiralmain in zic pli exact sur la spatla.

Co va quai cun l'electroinstallatura Elena Depuoz da Glion? U daventa forsa la spezialista da sanadad Sofia Parli successura dad Irina Tuor ch'è suenter il titel da campiunessa svizra schizunt daventada la meglra dal mund? ... Qua chattais tut las istorgias da ed enturn ils candidats als Swiss Skills 2018.

Elena Depuoz ha dumagnà ils Swiss Skills 2018

Pers intgins puncts ma anc tut pussaivel

Er ils automatichers Joel Flepp e Dominic Cadruvi han dumagnà passa la mesadad. Els èn cuntents malgrà ch'els hajan pers in pèr puncts tar il terz pensum, uschia ils dus Sursilvans. I saja tuttina anc tut pussaivel. Pli u main cuntenta cun sia prestaziun è Elena Depuoz. Ella è da l'avis ch'ella saja suenter bun la mesadad dals pensums in zic davos en cun las lavurs.

Elena Depuoz ha survegnì visitas e Sofia Parli ha gia fatg il sieu

L'electroinstallatura Elena Depuoz ha survegnì visitas permez la concurrenza. Ses schef Claudio Cadruvi ch'è il medem mument er responsabel per la scolaziun da tut ils electroinstallaturs en il Grischun ha guardà ad ella sur las spatlas.

Bain, ella ha fatg ina buna lavur e dal temp vesi er or detg pulit...
Autur: Claudio Cadruvischef d'Elena Depuoz

El agiunta però ch'i saja daventà fitg grev da giuditgar da dador quant buns ch'in candidat è en cumparegliaziun cun tschels. La lavur visibla vid la paraid quai na saja numnadamain betg pli il sulet. Els hajan da programmar, da dissegnar schemas ed er da schliar tschertas chaussas sin temp. Bler da quai na vesian ins strusch sco visitader u visitadra. La medaglia d'aur per Elena fiss però in siemi sco el di.

Entant che Elena Depuoz è permez la concurrenza ha Sofia Parli, la spezialista da sanadad da San Murezzan gia dumagnà ses pensum:

Suenter duas uras lavur è gia tut stà fatg. Uss resta ad ella be pli da spetgar fin sonda sin ils resultats e sperar ch'i tanschia per la medaglia d'aur. Cun sia prestaziun è ella cuntenta. In pitschen sbagl che disturba la giuvna da San Murezzan: Ella è ida cun ses pazient en pe blut a spass.

Livio Dosch è ina runda enavant

«I va anc cun la gnervusitad»

Tar l'electroinstallatura Elena Depuoz era la gnervusitad pli gronda sin via vers Berna, mardi en damaun. Suenter, durant endrizzar il plaz da lavur saja quella però svanida.

Ed er il spezialist da transports sin via, Livio Dosch da Cunter n'ha betg laschà starmentar dal fatg ch'i pudess gia esser a fin per el suenter be in di. El cumbatta numnadamain cun camiun e plunader en il sistem da K.O.

Ils dus automatichers sursilvans, Dominic Cadruvi e Joel Flepp han manegià ch'i vegnia segir anc mender cun la tensiun cura che la glieud guardia lura tiers ed els hajan da sa concentrar sin la lavur.

RR actualitad 07:00+