«Zieglerspital» a Berna è occupà d'autonoms sanesters

Autonoms da la sanestra han bloccà questa notg l'areal dal Zieglerspital a Berna. Els han vulì protestar encunter il center d'asil federal che duai vegnir endrizzà l'auter onn en l'ospital che n’è il mument betg occupà.

Il bajetg dal «Zieglerspital» a Berna.

Legenda da maletgs: Il bajetg dal «Zieglerspital» a Berna: fin uss era quel vid - uss han autonoms sanesters occupà el. Keystone

Tenor ils autonoms vegnian ils asilants serrads en il center senza avair in’atgna autonomia. Quai è vegnì communitgà en in messadi sin ina pagina d'internet e via Twitter. Ils occupants vulan che l’ospital daventa in lieu d’autonomia. Migrantas e migrants duain s’organisar sasez. Plinavant duai il Zieglerspital daventar in lieu da discussiun.

Contractivas tranter possessura ed occupants

Actualmain datti contractivas cun ils occupants. Quai ha confermà la possessura Spital Netz Bern AG. Plirs policist èn al lieu e segireschan ina da las entradas. L’occupaziun dal bajetg ha attratg simpatisants dals occupants che vulevan sa participar a las occurrenzas, a las qualas ils occupants avevan envidà via internet.

Anteriur ospital duai daventar center d'asil

Dapi la fin d'avust da quest onn na vegn il Zieglerspital betg pli nizzegià sco ospital. Avant era el in dals 3 ospitals da Berna sper l'Insel- ed il Tiefenauspital. Pervi d'ina gronda fusiun d'ospitals na vegn il Zieglerspital betg pli duvrà.

La fin d'october ha la citad da Berna decis da metter a disposiziun il Zieglerspital a la Confederaziun sco center d'asil federal. En tut duain 350 requirents d'asil vegnir plazzads en il bajetg.

En ina part da l'ospital vegnan ils emprims requirents sut tetg ils proxims dis per in temp temporar. In center d’asil federal duai l’ospital daventar vers mez dal 2016.

RR novitads 12:00