Siglir tar il cuntegn
cuntegn

Svizra Zermatt puspè cuntanschibel

Il vitg da Zermatt è puspè cuntanschibel, ils emprims trens circuleschan puspè. A partir da la gievgia duai alura l'entir traject puspè esser libers.

Tegts cuverts cun naiv.
Legenda: Il Vallais sfundra en la naiv. Keystone

Suenter las grondas navaglias dastgass la situaziun bainbaud sa calmar en il Vallais. Il privel da lavinas resta dentant. Entant ha l'institut federal per la perscrutaziun da naiv e lavinas (SLF) sbassà il privel sin stgalim 4. Il mardi aveva l'institut proclamà per tschertas parts dal Vallais Sura il pli aut privel da lavinas: stgalim 5. Quel stgalim proclamescha il SLF mo darar.

Zermatt n'è betg pli isolà

Il vitg da Zermatt è puspè cuntanschibels, ils emprims trens circuleschan puspè dapi quart passà las tschintg tranter Zermatt e Täsch, là ston ils passagiers alura midar sin bus fin a Visp, scriva la Matterhorn Gottard Bahn. A partir da la gievgia duai alura l’entir traject puspè esser libers.

A St. Niklaus, Täsch, Randa e Zermatt èn las scolas stadas serradas il mardi. Suenter ch'i aveva dà en la regiun enturn il Matterhorn fin dus meters naiv aifer 24 uras, èn radund 15'000 turists serrads en a Zermatt.

A Visp pon ils abitants turnar a chasa

Las 20 persunas ch’avevan stuì bandunar lur abitaziuns e ch'avevan chattà refugi tar persunas privatas u en in alloschi da la protecziun civila han pudì turnar en lur chasas. Quai ha decis il stab da crisa. La situaziun a Visp era daventada pli e pli precara suenter ch’igl aveva pluvì intensivamain.

La situaziun generala en il Vallais resta però precara.

Situaziun en il Grischun

Critica è era la situaziun da lavinas sisum la Surselva: En Val Medel e Tujetsch regia in grond privel da lavinas – stgalim 4. Quai è il segund aut privel. Quai munta che lavinas spontanas pon vegnir giu ed uschia periclitar il traffic. Plinavant è la situaziun sper las pistas fitg critica. Creschì è il privel da lavinas pervi dal favugn dals ultims dis che ha purtà blera plievgia e sur 1'200 meters sur mar fin in meter naiv.

Il privel da lavinas ha er consequenzas per il traffic. Uschia na curseschan nagins trens sur l'Alpsu ed er il Pass dal Lucmagn è serrà per motivs da segirtad.

RR novitads 06:00++