L'anteriur vice-president da la Partida cristiandemocratica svizra, Yannick Buttet, sa retira dal Cussegl naziunal. Sco quai che l'agentura da novitads svizra (SDA) rapporta, ha l'advocat da Buttet communitgà quai. El haja decis quai per proteger sia famiglia – però era en l'interess da la partida, declera Buttet. El punctuescha che questa decisiun n'haja da far nagut cun la procedura penala pendenta.
La procedura penala cunter Buttet
La procura publica vallesana renfatscha al politicher da la PCD d’avair mulestà ina ex-marusa. Quai ha confermà la procura publica envers la gasetta «NZZ am Sonntag». Constricziun sexuala vegn chastiada cun ina multa u cun praschun fin a trais onns. Suenter ch’il cas era vegnì public (30-11-2017), era Buttet sa retratg sco vicepresident da la Partida cristiandemocratica svizra sin l’entschatta da december.
Parlament reagescha
Il cas da Buttet ha era lantschà ina debatta davart mulestas sexualas en il parlament. Ensemen cun ils schefs da fracziun ha la delegaziun administrativa dal parlament decis da metter a disposiziun a las parlamentarias ed als parlamentaris in post spezialisà independent per cussegliaziun en connex cun mulesta sexuala.
RR novitads 07:00
