Il focus da la cumissiun da concurrenza WEKO resta er cun ses nov schef Andreas Heinemann il medem: Il cumbat cunter cartels e cunter l'isolaziun dal martgà ha vinavant la prioritad. Quai ha communitgà la WEKO en sia conferenza da medias annuala.
Cunzunt cunvegnas da pretschs e l'isolaziun dal martgà cun impedir imports parallels fetschian grond donn a l’economia publica. En consequenza ha la WEKO er sancziunà pliras interpresas l’onn passà. Tranter auter firmas da bajegiar u er La Posta Svizra.
La WEKO ha dapi il schaner in nov president: Il giurist d'economia Andreas Heinemann ha surpiglià quest uffizi da Vincent Martenet. Heinemann è dapi il 2011 commember da la cumissiun. Dal 2012 fin il 2018 ès el stà vicepresident da la WEKO.
Fin da las inquisiziuns en il Grischun
La WEKO quinta ch’ella possia en il decurs da quest onn terminar las inquisiziuns pertutgant las cunvegnas da pretschs che differentas interpresas da construcziuns grischunas han fatg ils onns 2008 enfin 2012.
Tenor Frank Stüssi, il vicedirectur responsabels per il sectur da construcziun, vegnan els ad annunziar en las proximas emnas la decisiun en in cas pli grond. La decisiun en ils ultims dus cas pendents duain vegnir annunziads el decurs da l’atun.
Metter fin a «geoblocking»
Sch'ins fa cumpras en l'internet èn las paginas da purschiders da l'exteriur savens bloccadas. Ins vegn svià sin ina pagina svizra nua ch'ins paja er pretschs svizzers. A quai vul in nov president da la cumissiun da concurrenza WEKO Andrea Heinemann metter ina fin. Il Cussegl federal duai stgaffir ina lescha che scumonda quai, pertge il scumond saja ina buna mesira per cuntrafar als pretschs auts en Svizra.
RR novitads 11:00
