Il Cussegl federal di Gea a la lètg per tuts, uschia duain pèrs da la medema schlattaina avair ils medems dretgs sco pèrs da schlattaina differenta. La ministra da giustia svizra Karin Keller-Sutter ha il mardi preschentà ils arguments dal Cussegl federal per la votaziun dals 26 da settember.
Eliminar inegualitads
L'introducziun da la lètg per tuts elimineschia il tractament inegual da pèrs da medema e da differenta schlattaina tar la natiralisaziun facilitada, l'adopziun e la medischina da reproducziun. Per il Cussegl federal na dettia naginas raschuns dad excluder pèrs da medema schlattaina da la lètg, ha argumentà il Cussegl federal. Per la lètg tranter um e dunna na sa midia nagut.
Oz pon umens e dunnas da la medema schlattaina laschar inscriver lur partenadi, na dastgan però betg maridar. Tenor la cussegliera federala Karin Keller-Sutter na duai il stadi dentant betg scriver avant als umans, co ch'els han da crear lur vita privata e da famiglia.
