Siglir tar il cuntegn

Header

Navigaziun

Carta da la Svizra.
Legenda: Il resultat è ina gronda surpresa. RTR
cuntegn

Votaziuns Resultats e reacziuns da la votaziun dals 11.03.2012

Il chantun Grischun di na a l’iniziativa dal pievel «Per metter ina fin a la construcziun excessiva da segundas abitaziuns». Quai cun 33’619 vuschs na (57%) cunter 25’017 vuschs gea (43%). In cler na datti da la Surselva. RTR ha rimnà reacziuns gist suenter la decisiun.

In cler na da la Surselva

Il protectur da l'ambient Franz Weber avant in placat per l'iniziativa.
Legenda: Il protectur da l'ambient Franz Weber ha lantschà l'iniziativa. Keystone

En egl ha la Surselva dà. Ella ha ditg cleramain na a l’iniziativa. Il pli cler era la decisiun en il cirquit da Rueun nua che trais quarts dals votants han mess in na en l’urna. Era cler era la chaussa en il cirquit da la Cadi cun 73 % e la Lumnezia cun 74 %. Cun var 60 % u dapli vuschs han il Grischun central e las Valladas dal Sid ditg na a l’iniziativa. En il Grischun dal Nord, la Partenza, Tavau, il Plaun e l'Engiadina è il na stà il pli flaivel.

Grondas discussiuns en Engiadina

Procurà per grondas discussiuns ha l'iniziativa en l’Engiadin’Ota. Quai mussan era il resultads a l’urna. Bain ha il cirquit da l’Engiadin’Ota ditg na a l’iniziativa, quai cun 56 %, pliras vischnancas han dentant ditg gea a l’iniziativa, per part mo cun paucas vuschs differenza. Uschia Bever (146 gea cunter 141 na), La Punt Chamues-ch (132 gea cunter 116 na) e Samedan (515 gea cunter 513 na). En l’Engiadina Bassa han ils da Lavin giu in’ureglia averta per l’iniziativa ed han detg gie a lezza (63 gea cunter 43 na).

Sin il nivel dals cirquits hai dà dus che han ditg gea a l’iniziativa, Seewis e Cuira. En la chapitala Grischuna èsi stà ina chaussa plitost stretga. Mo gist 40 vuschs han fatg la differenza per in gea (4’938 gea cunter 4’898 na).

Pigniu ha ditg cleramain na

In sguard sin las singulas vischnancas mussa che Pigniu ha ditg il pli clar na a l’iniziativa. Tut ils diesch votants ch’èn i a l’urna han ditg na a l’iniziativa, pia 100 %. Da l’autra vart dal spectrum è la vischnanca da Calfreisen en il Scanvetg. Ses votants han ditg cun 68% da las vuschs gea a l’iniziativa (13 gea cunter 6 na).

Las cifras da la Svizra

Il suveran svizzer di gea a l'iniziativa per far ina fin a la construcziun excessiva da segundas abitaziuns. Il gea è zunt stretg cun 50,63 pertschient da las vuschs. 15 chantuns han ditg GEA a l'iniziativa da Franz Weber. L'iniziativa pretenda da las vischnancas da restrenscher la construcziun da secundas abitaziuns sin 20 %.

Il resultat vegn acceptà

Ils titels da las gasettas suenter il gea a l'iniziativa.
Legenda: Ils titels da las gasettas. RTR, A. Camartin

La cussegliera federala Doris Leuthard quinta cun ina realisaziun difficila da l’iniziativa per limitar segundas abitaziuns. Per la conferenza da las regenzas dals chantuns alpins è il resultat da la votaziun deplorabel, saja dentant d’acceptar. Ussa stoppian ils iniziants tegnair pled e porscher maun per soluziuns pragmaticas, uschia la conferenza en ina communicaziun.

Legenda: Guardar il video Perspectivas da la branscha da contrucziun: Scrinaria Maissen. Durada 03:23 minutas.
Or da Telesguard dals 12.03.2012.