Siglir tar il cuntegn

Header

Navigaziun

Legenda: Guardar il video I vegn stretg per l'iniziativa per l'abandun da l'energia nucleara. Durada 00:49 minutas.
Or da Telesguard dals 16.11.2016.
cuntegn

Votaziuns Pari per energia nucleara – trend vers na

Bainbaud decida il suveran svizzer davart l’iniziativa per l’abandun da l’energia nucleara. Ina votaziun gia ils 6 da november n’avess purtà per nagin ina clera maioritad: 48% fissan stads persuenter, 46% encunter. Quai mussa la segund’enquista da gfs.bern per incumbensa da la SRG SSR.

Cumpareglia cun l’emprim trend datti uss damain vuschs per (-9%) e dapli cunter (+10%) l’iniziativa.
Legenda: Cumpareglia cun l’emprim trend datti uss damain vuschs per (-9%) e dapli cunter (+10%) l’iniziativa. Grafica RTR

Il svilup da l’intenziun da votar cumpareglià cun l’emprim trend mussa in trend vers in na. Ils adversaris ha en be quatter emnas fatg in plus da 10%. Durant il medem temp han ils aderents pers 9%. La participaziun a l’urna avess muntà a 51%.

Igl è da spetgar in «na»

En la fasa principala dal cumbat da votaziun saja l’avantatg dals aderents uschia bunamain svani, constateschan ils perscrutaders da l’institut gfs.bern. I vegn spetgà ch’il project federal vegn refusà, e quai bler pli cler ch’anc avant in mais.

La polarisaziun tenor partida è daventada levamain pli ferma. A la basa dals Verds èn 93% per l’atgna iniziativa, 5% èn encunter. Er tar la PS datti in surpli ch’èn persuenter (76%). Independents da partida èn er en la segund’enquista sa vulvids vers il gea.

48% èn persuenter u plitost persuenter, 46% encunter u plitost encunter da sortir da l'energia nucleara.
Legenda: Bunamain situaziun da pari: 48% èn persuenter u plitost persuenter, 46% encunter u plitost encunter da sortir da l'energia nucleara. Grafica RTR

Posiziun da PCD anc averta

Il cuntrapol tar ils Verds e la PS èn ils simpatisants da la PPS e da la PLD. Omaduas gruppas da votants èn anc pli fitg ch’avant in mais cunter l’iniziativa per l’abandun da l’energia nucleara. Be tar la PCD saja la posiziun anc averta, scriva gfs.bern. Das arguments ennà tendeschian ils votants da dir gea. La strategia d’energia 2050 haja però in effect d’alternativa.

La pli grond'intschertezza davart il resultat datti tenor gfs.bern en las regiuns cun minoritads linguisticas. En Svizra taliana è il gea actualmain davant, ed er en Svizra franzosa dat quai dapli aderents ch’adversaris. La prontadad da dir gea va però enavos.

«Cas normal» per iniziativa sanestra

La retschertga

Il segund trend da votaziun è vegnì realisà tranter ils 2 ed ils 9 da november 2016. L'institut gfs.bern ha dumandà 1'406 persunas cun dretg da votar. Il sbagl da prova è tar 2,7%. Las votaziuns federalas èn ils 27 da november 2016.

L’argument il pli popular per l’iniziativa saja che la midada d’energia saja be da realisar cun l’abandun regulà. Bunamain dus terzs èn da l’avis ch’igl è pussaivel da bandunar l’energia nucleara.

55% dals dumandads èn però da l’avis che regenza e parlament hajan chattà ina soluziun bun’avunda cun la strategia d’energia 2050.

Il muster observà fin qua correspunda tenor l’institut al cas normal tar in’iniziativa da la sanestra. Ella mussia megliers resultats ch’autras, perquai che la gronda part da persunas betg liadas a partidas sustegnian ella.

RR novitads 17:00