L'iniziativa No Billag è vegnida inoltrada il december 2015 cun 112'191 suttascripziuns. La finamira è d'abolir las taxas per radio e televisiun.
La constituziun federala duai vegnir midada suandantamain (artitgel 93):
- La Confederaziun ingiantescha regularmain concessiuns per radio e televisiun.
- Ella na subvenziunescha naginas staziuns da radio e televisiun. Ella po far pajaments per emetter communicaziuns uffizialas urgentas.
- La Confederaziun u terzas varts incumbensadas dad ella na dastgan incassar naginas taxas da recepziun.
- En temps da pasch na maina la Confederaziun naginas atgnas staziuns da radio e televisiun.
Ils iniziants derivan ord las retschas da la PLD giuvna e la PPS giuvna. Il Cussegl federal ed il parlament refusan l'iniziativa No Billag.
Arguments GEA a l'iniziativa
Taxas sfurzadas | Mintgin duai pudair decider sez sch'el è pront da pajar la taxa da 451 francs ad onn u betg. |
Interpresas | Interpresas pajan dubel las taxas da radio e televisiun. |
Economia | Senza las taxas han svizras e svizzers a disposiziun quels daners per autras chaussas. |
Arguments NA a l'iniziativa
Situaziun da medias | L'iniziativa periclitescha la diversitad da las medias ed ina rapportaziun multifara ed equilibrada da l'entira Svizra. |
Minoritads | Senza taxas n'èsi betg pussaivel da finanziar programs da radio e televisiun en la Svizra rumantscha, taliana e franzosa. |
SRG SSR | L'iniziativa vul destruir la SRG SSR e pren en cumpra la sperdita da 6'000 plazzas da lavur. |
Taxas da radio e televisiun
Actualmain munta la taxa da radio e televisiun a 451 francs ad onn. A partir da l'onn 2019 sa reducescha questa taxa sin 365 francs ad onn.
L'onn 2016 è quai stà in retgav da 1.37 milliardas francs. La pli gronda part (1.24 milliardas francs) è ida a la SRG SSR. Dentant era 21 radios locals e 13 televisiuns regiunalas han survegnì daners ord questas taxas, numnadamain 61 milliuns francs.