Siglir tar il cuntegn

Header

cuntegn

Votaziuns Ils resultats cumpact

Las 3 iniziativas federalas han fatg naufragi. Tuttas trais èn vegnidas refusadas cleramain dal suveran svizzer. A l’iniziativa “Basta taglias pauschalas" han 59,2% dals votants detg na.

Anc pli clers è il na stà tar l’iniziativa "Stop a la surpopulaziun" cun 74,1%. Cunter l’iniziativa d’aur "Salvai l'aur da la Svizra" èn schizunt 77,3% dals votants svizzers s’exprimì. Tut ils chantuns han refusà las trais iniziativas danor il chantun Schaffusa quella da la taglia pauschala.

Cler na dals Grischuns

Er ils votants dal Grischun han refusà cleramain tuttas trais iniziativas federalas. L’iniziativa “Basta taglias pauschalas” han ils Grischuns refusà cun 71% da las vuschs (44’296 na cunter 17’884 gea).

Ed anc pli cler è il na tar tschellas duas iniziativas stà: A l’iniziativa "Stop a la surpopulaziun" (Ecopop) han 78% dals votants grischuns ditg na (48’404 na cunter 14’027 gea) e l’iniziativa "Salvai l'aur da la Svizra" han els schizunt sbittà cun 80% da las vuschs (48'955 na cunter 12’510 gea). La participaziun a las votaziun è stada tar bun 46%.

Bunamain 2 terzs dian gea a la refurma dal territori

Grafica da survista dals resultads da la votaziun chantunala.
Legenda: Grafica da survista dals resultads da la votaziun chantunala. RTR

Cun 62,6% è la maioritad da las vuschs per la lescha generala davart la refurma dal territori detg gronda. 33'537 persunas han votà gea, 20'021 persunas han votà na.

Dals totalmain 39 cirquits dian 29 gea a la lescha da basa. Ils na's derivan en spezial dals cirquits sisum la Surselva, l'Engiadin'Ota, il Mesauc ed il Partenz.

Artitgels legids il pli savens