Lescha da chatscha
Sch’il suveran svizzer avess gì da vuschar l’entschatta avust, avess ina pitschna maioritad approvà la revisiun da la lescha da chatscha. 54% dals votants e da las votantas avessan segir u plitost ditg Gea. 26% avessan percunter ditg segir u plitost Na. Uschia sa dat in cler avantatg per la vart dals aderents, in pèr emnas avant la votaziun. 10% èn anc betg decis.
La lescha da chatscha revedida ha tenor gfs.bern sustegn ordaifer ils centers gronds e tar ils umens. Ed i dat sulet stretgas maioritads tar las dunnas e tar ils abitants e las abitantas da las citads. Tenor gfs.bern pon emoziuns dentant anc influenzar a curta vista il resultat.
Congedi da paternitad
Var dus mais avant la votaziun, avess ina clera maioritad da 63% segir u plitost sustegnì in congedi da paternitad da duas emnas. Plitost u cleramain cunter fissan 35%, betg anc decis èn sulettamain 2%. Uschia han ils aderents dal congedi da paternitad in avantatg da 28% per las davosas emnas avant la votaziun, sco gfs.bern scriva en ses rapport davart la retschertga.
Il congedi da paternitad mussa tenor gfs.bern in muster enconuschent, cun la Partida populara svizra cunter il rest da las partidas. Ferms Geas èn da spetgar dals verds, dals socialdemocrats e dals verdliberals, era in Gea è mintgamai da spetgar da la PCD, da la PLD e da persunas senza lioms cun partidas. En tut discurra gfs.bern d’ina situaziun da partenza confortabla per il congedi da paternitad, in Gea saja il scenari il pli realistic.
Deducziuns per la tgira d’uffants
Ils 8 d’avust avessi dà ina stretga maioritad per las deducziuns per la tgira d’uffants. 51% dals dumandads cun ina ferma intenziun dad ir a vuschar avessan mess in Gea en l’urna, 43% in Na. L’avantatg da la vart dals Geas è stretg, e blers che vulan ir a vuschar èn sulet tendenzialmain decis (47%) u indecis (6%).
Il trend mussa tenor gfs.bern, che la glieud n’è anc ditg betg propi sa decidida co vuschar. E las differenzas tranter la basa ed ils manaders da las partidas laschian supponer, che las intenziuns da vuschar vegnian anc a sa midar pli fitg. Cun resguardar tut ils aspects è gfs.bern da l’avis, che la decisiun davart las deducziuns per la tgira d’uffants saja anc averta.
Cler Na a l'iniziativa da limitaziun
Sch'i fiss vegnì vuschà gia l'entschatta avust, avessan 61% dals burgais cun dretg da vuschar ditg Na u plitost Na a l'iniziativa da limitaziun. 35% avessan approvà u plitost approvà quella. Ils adversaris van uschia cun in avantatg da 26% en quest cumbat da votaziun, scriva gfs.bern.
Prest 70% dals dumandads han gia ina clera opiniun davart l'iniziativa da limitaziun. Els vuschassan pia u cler encunter ubain cler per l'iniziativa. 26% dals dumandads èn plitost per u encunter. Quai munta che la furmaziun da l'opiniun è gia pulit avanzada per esser uschè baud en il cumbat da votaziun.
Per regla è il scenari tar las iniziativas dal pievel, che la cumpart da las vuschs che din Na crescha en il decurs dal cumbat da votaziun. Auter ch'autras iniziativas da l'ultim temp, ha l'iniziativa da limitaziun betg pudì far in start cun in avantatg d'aderents.
Gea a la cumpra da novs aviuns da cumbat
Radund dus mais avant la votaziun avess la maioritad da las votantas e dals votants ditg cun 58% plitost u cleramain Gea a la cumpra da novs aviuns da cumbat. Plitost u cleramain encunter èn 29% da las votantas e dals votants.
Tar la cumpra datti ina gronda polarisaziun tranter ils champs politics ed er tranter ils champs da la societad. Uschia èn ils Verds e la Partida socialdemocratica las sulettas partidas ch'èn cleramain encunter la cumpra. Ma i dat er il foss tranter la Svizra franzosa ch'è plitost cunter la cumpra, e la Svizra tudestga ch'è plitost per. Ma er tranter la generaziun pli giuvna (45% Gea) e la generaziun pli veglia (64% Gea) sa mussan differenzas.
Tar ils arguments datti in cler avantatg per ils aderents dals aviuns: Il sustegn general per in'atgna aviatica militara è collia cun la necessitad da renovar la flotta d'aviuns fin il 2030. Sin la vart dals adversaris n'è nagin argument acceptabel per ina maioritad, scriva gfs.bern en ses rapport.
La retschertga da l’institut da perscrutaziun gfs.bern è vegnida fatga tranter ils 3 ed ils 17 d'avust 2020 tar 29'540 persunas cun dretg da vuschar. La quota da sbagl è tar +/- 2,9 puncts procentuals.
