Actualmain èsi da vesair dapertut placats politics che fan reclama per las votaziuns. Savens sa chattan quels vid la lautga dal balcun u la paraid da la chasa. Intgins locaturs scumondan quella reclama. È quai dentant lubì?
La situaziun giuridica en curt
- Sco dretg fundamental en la constituziun federala èsi fixa, che mintgin ha il dretg da s’exprimer libramain e d’avair ina atgna opiniun. Medemamain vala quai era per derasar in’opiniun politica. Avant votaziuns fan quai blera glieud. Sco per exempel pender si transparents.
- A blers locaturs na plascha quai dentant betg. I dettia in reglament da chasa, che scumondia explicit da fixar placats.
- Sche tals scumonds èn lubids è dispitaivel, declera l’experta per dretg tar SRF, Gabriela Baumgartner. Ils scumonds ch’èn fixads en il reglament da chasa stoppian esser objectivamain giustifitgads e na dastgan betg cuntrafar als dretgs fundamentals dals locataris.
- Quai na vala dentant betg per placats che pendan vid la lautga d’in balcun u vid la paraid-chasa. Quels spazis na tutgan betg pli tar l’abitaziun affittada. Ord quest motiv dastga il locatur scumandar mintga furma da bandieras en quests spazis.
- Lubì è percunter sch’ins penda bandieras/placats endadens da fanestras u endadens il spazi dal balcun.