Votaziuns - Betg dapli AVS, nagin’economia verda, dapli surveglianza

NA: Iniziativa dal pievel «AVS plus: per ina AVS ferma»

Cun l’iniziativa avessan las rentas duì vegnir auzadas pauschalmain per 10%. Quest tema è uss giud maisa. Il suveran svizzer ha refusà l’iniziativa «AVS plus» da l’uniun sindicala cun 59,4% vuschs na. Er ina maioritad da 18 chantuns ha refusà il project da votaziun.

Iniziativa sparta la Svizra

Cunter il trend naziunal dian ils chantuns Giura, Neuschatel, Genevra, Tessin e Vad gea. Cun 59,5% ha il chantun Giura dà il pli grond consentiment.

audio

16:50 Berna – reacziuns naziunalas tar il na svizzer ad AVSplus

03:28 min, ord Novitads dals 25.09.2016.

laschar ir. Durada: 3 minutas 28 Secundas.

Jau hai natiralmain bain sperà ch'i pudess ina giada dar ina miracla…

Il Vallais ed il chantun Friburg èn sa mess en l’opposiziun. Ils pitschens chantuns en la Svizra Orientala e Centrala han refusà l’iniziativa il pli cler. En l’Appenzell Dadens han 77,7% dals votants ditg na, a Sursilvania 75,1%. Stretg è il resultat stà a Basilea-Citad cun 50,1% na.

Il resultat mussa ina giada dapli: Gist areguard dumondas socialpoliticas èn la Svizra franzosa e tudestga savens da differents avis a l’urna. Per regla tiran ils Romands la curta – sco oz.

NA: Iniziativa dal pievel «Per in’economia verda»

La tema da donns economics è stada memia gronda. En Svizra na duai quai betg dar «in’economia verda». 63,6% da las votantas e dals votants ha mess in na en l’urna. Sulettamain il chantun Genevra ha ditg gea al project federal, quai cun 51,9%. En la Svizra romanda ha il project dals Verds giudì dapli simpatia ch’en la Svizra tudestga.

La vart opposta è en sia campagna sa servida fitg dals giuvens cunter ils vegls, quai ch'è fitg privlus.

audio

16:40 Berna – reacziuns tar il na svizzer a l’economia verda

03:03 min, ord Novitads dals 25.09.2016.

laschar ir. Durada: 3 minutas 3 Secundas.

Cleras cumparts cunter iniziativa

Radund 1’430’200 persunas han inoltrà la dumengia da votaziun in na, 819’800 in gea. Il pli cler na han ditg ils chantuns da Sviz cun sur 78% sco er Sur- e Sutsilvania cun mintgamai dapli che 77%. Pesantamain na ha ditg sco sulet chantun romand il Vallais (71%).

Basilea-Champagna era cun 53% il chantun tudestg cun il pli bass na. En tut ils auters chantuns da la Svizra tudestga munta la cumpart da na a dapli che 62%. Il Tessin ha refusà l’iniziativa cun radund 60% da las vuschs.

Nus vegnin gea en ina situaziun nua ch'i mancan en 10 fin 15 onns mintg'onn radund set milliardas en l'AVS.

GEA: Lescha federala davart il servetsch d’infurmaziun

Il suveran svizzer ha acceptà la nova lescha cun 65,5% gea.

Il pli fitg ha fatg udir sia vusch il chantun da Vad cun 74%, suandà dal chantun Sutsilvania cun radund 70%. A Lucerna, Zug e Sursilvania han 69% ditg gea, a Friburg 67%. Il pli bass resultat sa mussa a Basilea-Citad cun 55%.

Dapli controlla e responsabladad

Cun la nova lescha dastga il servetsch federal d’infurmaziun tadlar discurs da telefon, intercurir stanzas privatas ed installar minispiuns en quella sco er infiltrar computers e duvrar apparats da localisaziun.

Ils adversaris da la revisiun da la lescha averteschan ch’il resultat pudess manar a dapli surveglianza. Tenor els è uss il parlament responsabel: Las controllas «pregiadas savens» stoppian uss funcziunar, esser adequatas e la publicitad stoppia vegnir infurmada, admonescha il «Bündnis gegen den Schnüffelstaat».

Ord vista dals aderents survegn la Svizra ina lescha moderna. L’adattaziun saja stada necessaria ed auzia la segirezza en Svizra, ha ditg la cussegliera naziunala Corina Eichenberger. Dapli cumpetenzas muntian dentant er dapli controlla. Uschia stoppia la cumissiun da gestiun accumpagnar stretgamain la realisaziun da la nova lescha davart il servetsch d’infurmaziun.

RR novitads 17:00