Per ils iniziants è quai la la resposta sin la midada dal mund da lavur e las sfidas dal futur. Per ils adversaris è l'iniziativa in project utopic, gea perfin in'attatga sin las valurs da la Svizra.
La vita custa. E per finanziar quella main nus a lavurar. L'iniziativa dal pievel «per in'entrada da basa nuncundiziunada» vul midar quai. Mintga persuna che viva en Svizra duai survegnir ina tscherta summa daners e quai independent sch'el lavura ni buc.
Per Daniel Häni, in dals iniziants dal project, è la finamira d'augmentar la valur da la lavur, da motivar ils carstgauns e da dar ad els dapli libertad finanziala e dapli atgna responsabladad. Quai saja impurtant, cunzunt en vista a la midadas fundamentalas che spetgian il mund da lavur ils proxims onns.
«Il futur vegn tut quai ch’ins sa calcular ed automatisar fatg da roboters e d’algoritems. Ed ussa datti duas pussaivladads da reagir sin quai svilup: U che nus perdain la lavur e cun quai nossa existenza ni che nus stgaffin in’entrada da basa nuncundiziunada per che la lavur vegn liberada e ch’ils carstgauns pon s’occupar da quai che las maschinas na pon betg far.»
Con che mintgin duai survegnir na stat betg scrit en il text da l'iniziativa. Quai duai il parlament decider. Ils iniziants tschantschan dentant da 2'500 francs il mains per ina persuna creschida e 625 francs il mains per mintg’uffant.
La realisaziun da l'iniziativa custass uschia mintg'onn 208 milliardas francs. Bun 55 milliardas francs savess ins transferir da la segirada sociala e da l’agid social. Ulteriurs 128 milliardas francs vegnissan da las pajas existentas.
Restassan anc 25 milliardas francs. Tenor Oswald Sigg, l'anteriur pledader dal Cussegl federal, san ins finanziar quels cun ina taxa sin mintga transacziun finanziala.
«Mintg’onn vegnan fatgas en Svizra transacziuns finanzialas en l’autezza da 1500 milliardas francs. Il retgav d’ina uschenumnada microtaxa fiss uschia fitg lucrativ e na pudess betg mo finanziar in’entrada da basa mabain anc bler autras expensas publicas.»
Betg la dretga resposta sin ils problems dal mund da lavur da damaun
Per ils adversaris da l'iniziativa n'è quella betg la dretga resposta sin las sfidas dal futur en il mund da lavur. E resistenza vegn da dretg sco era da sanester. L'iniziativa saja in'attatga sin las valurs che sajan caracteristicas per la Svizra, di per exempel la nova presidenta da la PLD, Petra Gössi.
In gea a l’iniziativa manassi ad ina dependenza totala dal stadi. Factic fiss quai in’extensiun smesiraivla da noss sistem social.
«I vegn adina a dar novas pussaivladads e furmas da lavur. Per mai èsi era cler che mintgin sto sa sviluppar vinavant e sa scolar. Avant quellas sfidas na dastg'ins betg serrar ils egls. Ch’il stadi surpiglia la responsabladad per mintgin è ina proposta totalmain fallida.»
La cussegliera naziunala socialdemocratica Susanne Leutenegger-Oberholzer crai ch'in gea a l'iniziativa mettess sut squitsch las assicuranzas socialas e che quellas pudessan la fin finala vegnir abolidas. Ultra da quai pretendian els ina paja minimala da 4’000 francs. L’entrada da basa proponida saja cleramain pli bassa e pudess augmentar il squitsch sin las pajas. Ed i saja pussaivel ch’i vegniss uschia tolerà ina dischoccupaziun da basa. Quai na veglia la partida socialdemocratica absolutamain betg.
Ma era ord vista da las dunnas stoppian ins esser sceptic quai che pertutga l'entrada da basa nuncundiziunada. Cun quella fiss la motivaziun da stgaffir plazzas per dunnas pli pitschna, crai ella.
«L’entrada da basa è ina sort da paja per chasarinas e quai n’è betg la dretga via da promover las dunnas dad ir a lavurar.»
Resistenza cunter l'iniziativa na datti betg mo da las partidas, mabain er da la populaziun. Quai mussa l'ultim barometer da votaziun: 72 pertschient dals dumandads na vulan savair nagut dad in'entrada da basa nuncundiziunada.
RR actualitad 11:00