L'inserat che saja vegnì duvrà en il cumbat da votaziun davart l'immigraziun da massa saja discriminant ed haja uschia influenzà e sfalsifitgà il resultat da votaziun dals 9 da favrer 2014, uschia l'argument dal recurs.
I va per l'inserat "Cosovars taglian si Svizzers". Quel haja manipulà il process da la furmaziun da la voluntad da las votantas e dals votants. Ils dus manaders dal recurs èn ils dus experts dal dretg penal David Gibor e Tomas Poledna, omadus da Turitg. Cun laschar tiers l'accusa haja la dretgira penala exprimì che l'inserat da la PPS saja penalmain relevant e n'excludia betg ch'i pudess esser in delict, ha ditg Gibor.
Avant dretgira pervi da l'inserat
Pervi da quest inserat dispitaivel ston il secretari general da la PPS, Martin Baltisser e sia substituta Silvia Bär sa responsar avant dretgira penala pervi da discriminaziun repetida da las razzas. L'inserat era part da la campagna da la PPS per l'iniziativa cunter l'immigraziun da massa. Il president da la PPS svizra, Toni Brunner, na vegn betg a seser sin il banc d'accusaziun, er sche l'inquisiziun penala era il prim drizzada cunter el. Sco cusseglier naziunal gauda Brunner immunitad parlamentara.
Il suveran svizzer ha approvà ils 9 da favrer 2014 l'iniziativa d'immigraziun da massa cun 50,3 % da las vuschs.