Siglir tar il cuntegn

Header

cuntegn

Svizra Vögele Shoes en mauns polacs

La CCC Group cun sedia en Pologna surpiglia per 10 milliuns francs 70% da l'interpresa da chalzers Karl Vögele SA.

L'interpresa da chalzers Karl Vögele SA cun las marcas Vögele Shoes, Bingo Shoe Discount e MAX Shoes va en mauns polacs. La gruppa CCC cun sedia a Polkowice surpiglia per 10 milliuns francs, 70% da l'interpresa tradiziunala dad Uznach en il chantun Son Gagl. Vitiers surpiglia la gruppa er ils daivets da la Karl Vögele SA.

Vendì lur cumpart hajan ils commembers da la famiglia Vögele che na sajan betg activs en l'interpresa, ha ditg ina pledadra. Augmentà sia cumpart da 10% sin 30% ha percunter il president dal cussegl d'administraziun Max Manuel Vögele. El resta en ses uffizi.

Sco l'interpresa Karl Vögele communitgescha, saja ella uss suenter dus onns da restructuraziun puspè dad extender sia posiziun. Spezialmain en il sectur online, sa dettian cun la CCC novas perspectivas per l'interpresa. La Karl Vögele SA è suenter Dosenbach il numer dus sin il martgà da chalzers svizzer.

RR novitads 12:00

Artitgels legids il pli savens