La Svizra n'ha vinavant nagin cas confermà dal virus da Corona. Tuttina haja il Cussegl federal decis mesiras supplementaras. Quai ha communitgà il minister da sanadad Alain Berset a Berna. Cun ulteriurs tests e cun infurmar pli fitg la populaziun duajala Svizra esser pronta per isolar spertamain pussaivels cas suspectus.
Dapli mesiras dettia cunzunt en il Tessin e sin ils eroports: Uschia lantschia la Confederaziun ina campagna al cunfin cun l'Italia ed ina als eroports. En pli dettia a partir da damaun er tests dal virus directamain en il Tessin.
Berset ha agiuntà d'esser cuntinuadamain en contact cun las autoritads talianas e quellas dad auters stadis. Ed era la coordinaziun tranter Berna ed ils chantuns saja buna.
Mesiras d'igiena
Il directur da l'Uffizi federal da sanadad publica BAG, Pascal Strupler, ha suttastritgà che mesiras da igiena – sco lavar regularmain ils mauns – sajan actualmain il pli impurtant che la populaziun duaja resguardar.
La Confederaziun prendia pir cuntramesiras, cura ch'i dettia in'epidemia en Svizra. Quai na saja fin uss betg il cas.
RTR novitads 14:00
