Siglir tar il cuntegn
Inhalt

Svizra Vicepresident da la PCD è suspendì

La Partida cristiandemocratica Svizra (PCD) ha suspendì per immediat sco vicepresident il cusseglier naziunal Yannick Buttet dal Vallais. La decisiun è crudada suenter che Buttet aveva infurmà la partida ch'i dettia ina procedura penala cunter el.

Buttet sesa al pult e tegn ses mauns avant el.
Legenda: Buttet duai avair mulestà ina dunna. Uss è el suspendì. Keystone

El sez haja dumandà per sia suspensiun, ha communitgà il president da la PCD, Gerhard Pfister. Tenor medias da la Svizra franzosa duai Buttet avair mulestà ina dunna enfin che la polizia saja vegnida.

La Partida cristiandemocratica dal Vallais sa mussa fitg schoccada. D'excluder Buttet da la partida na saja dentant nagina opziun. Vinavant valia la presumziun d'innocenza.

Il president da la partida vallesana, Serge Métrailler, ha ditg envers l'agentura da novitads svizra SDA, ch'il sa cuntegnair da Buttet descrit na tutgia betg tar la persuna ch'el enconuschia dapi blers onns.

RR novitads 10:00