Siglir tar il cuntegn
Inhalt

Svizra Vias ord la crisa da latg

Dapi ch’il martgà da latg tranter la Svizra e l’UE e vegnì avert parzialmain sa sbassan er ils pretschs per il latg svizzer. A l’inscunter suprem da latg sin il Gurten a Berna han ils purs preschentà lur pretaisas. Il tenor è cler: politica e branscha da latg ston agir sveltamain.

Per lur latg survegnan ils purs adina damain daners.
Legenda: Per lur latg survegnan ils purs adina damain daners. Keystone

L’Uniun purila svizra, ils Producents da latg svizzers e l’Organisaziun da la branscha da latg èn sa scuntrads il venderdi ad in inscunter suprem. Els han discutà pussaivladads per stabilisar il pretsch da latg svizzer.

En in communiqué communabel vegn resumà il tenor general: La politica e la branscha da latg ston sveltamain realisar mesiras per garantir l’existenza da manaschis che produceschan latg ed uschia segirar la producziun da latg svizzer.

Examinar politica da latg

Las organisaziuns scrivan ch’i dovria mesiras a curta vista per spendrar la producziun da latg en Svizra. Il squitsch sin ils producents da latsch creschia vinavant e na saja betg da responsar. Il latg haja in’impurtanta posiziun aifer il martgà svizzer. Quai han er accentuà ils represchentants da Emmi, Cremo, Coop e Migros.

Ina pretaisa centrala è la protecziun politica dals producents da latg sin basa da art. 37 da la lescha d’agricultura.

Tuts acturs èn dumandads

Las pretaisas a curta vista èn

  • in auzament immediat dals subsidis per il bainstar dals animals
  • l’imputaziun da la producziun indigena da tirc en il program per la producziun da latg e charn che sa basa sin pastgiras
  • in’offensiva supplementara per promover la vendita

RR actualitad 17:00