Siglir tar il cuntegn
cuntegn

Svizra Viafiers Jungfrau: Asiats procuran per fitg bunas cifras

Las Viafiers da la Jungfrau han nudà in uschè bun semester sco anc mai, surtut grazia als giasts da l'Asia. Ils emprims 6 mais da l'onn è la svieuta creschida per passa 17,1% sin 92,2 milliuns francs. Il gudogn è schizunt creschì per 60% sin 17 milliuns.

ina viafier cotschna da la Jungfraubahn, dasper intgins giasts da l'Asia
Legenda: Ils giasts da l'Asia ha emplenì bain las cassas da las Viafiers da la Jungfrau. Keystone

Avant in onn aveva la gruppa anc sentì fitg ils dubis da segirezza dals Asiats pervi d'attatgas terroristicas en l'Europa. Ussa ha l'interpresa pudì profitar dal traffic d'excursiun sin il Jungfraujoch e d'ina pli gronda dumonda ord l'Asia, uschia communitgescha la gruppa Viafiers da la Jungfrau.
Dal schaner fin il zercladur èn 464'600 persunas viagiadas sin il Jungfraujoch, quai è bunamain in quart dapli che durant la medema perioda d'avant in onn ed uschè blers sco anc mai.
Main bain è stada la fatschenta dal sport d'enviern. Malgrà ina partenza baud il november 2016 era l'entira stagiun 2016/2017 sut la media, uschia scriva l'interpresa.

RR novitads 08:00