Viafier vul spargnar current electric

Las Viafiers federalas han annunzià da vulair spargnar radund 11 uras gigawat electricitad pervi d’in sistem nov da traffic. Quai è tant sco quai ch’ina citad mesauna dovra en in onn, communitgeschan las Viafiers federalas.

Dus trens da las Viafiers federalas svizras

Legenda da maletgs: Cun in nov sistem da traffic po la VFF spargnar 4% da ses current electric. Keystone

Il nov sistem da traffic duai impedir ch’ils trens ston sa fermar senza ch’i è necessari e silsuenter puspè accelerar, quai che dovra bler current electric. Cun quest sistem nov quintas las Viafiers federals svizras da spargnar bun 4% dal current electric da l’onn.

En in pèr onns duai quai sistem esser dapertut sin la rait en funcziun, pliras viafiers en l’exteriur mussan interess vida quest sistem nov da traffic.

Dapli gudogn

Plinavant han las Viafiers federalas annunzià in gudogn da 373 milliuns francs per l’onn 2014. Quai sajan 135 milliuns francs dapli che l’onn avant communitgescha il concern. En emprima lingia hajan ins fatg dapli gudogn cun la vendita d’immobiglias.

RR novitads 16:00