L'emprim di da ses viadi tradiziunal ha il Cussegl federal visità l'universitad da Berna, Saint-Imier e l'Emmental. Sco usità ha il president da la Confederaziun Johann Schneider Ammann envidà ses collegas d'uffizi sin in viadi en ses chantun d'origin, Berna.
Emprima staziun è stà l'universitad da Berna, nua ch'il Cussegl federal è vegnì infurmà davart la lavur dal Center for Space and Habitability, il center svizzer per la perscrutaziun da l'univers. Silsuenter ha la regenza federala visità il Giura bernais, Saint-Imier ed il suentermezdi ha il Cussegl federal visità in'interpresa a Wasen en l'Emmental.