Siglir tar il cuntegn

Header

cuntegn

Svizra Veto sco frain d’urgenza tar ordinaziuns federalas

Il parlament svizzer duai survegnir il dretg da veto tar ordinaziuns dal Cussegl federal. Suenter il Cussegl naziunal è uss era la cumissiun dal Cussegl dals chantuns s'exprimida persuenter. Cun ordinaziuns metta il Cussegl federal en la pratica leschas en atgna cumpetenza.

Cun otg cunter trais vuschs tar ina abstenziun ha la cumissiun d'instituziuns politicas approvà in’iniziativa parlamentara da Thomas Aeschi (PPS/Zug). Fin uss aveva la cumissiun adina refusà in veto tar ordinaziuns.

Il basegn è sa mussà

Las experientschas cun ordinaziuns decretadas avant curt hajan mussà, ch’il parlament haja da basegn d’in instrument effectiv, argumentescha la cumissiun. Suenter il gea da la cumissiun dal Cussegl dals chantuns po la cumissiun dal Cussegl naziunal uss elavurar ina proposta. Decider surlonder vegn il parlament.

Era vuschs ch'admoneschan

Per cusseglier naziunal Thomas Aeschi è il veto tar ordinaziuns ina sort frain d’urgenza. Quai damai che leschas na vegnian ozendi betg adina realisadas sco il parlament haja vulì. Adversaris averteschan da midadas vi dal sistem da la separaziun da las pussanzas, els teman bloccadas.

I duvrass ina terza da las vuschs

Tenor la proposta duvrass in veto il sustegn d’ina terza dal Cussegl naziunal u dal Cussegl dals chantuns, e quai aifer 14 dis. Cun il veto vegniss in’ordinaziun mo refusada, ella na pudess betg vegnir midada.

RR novitads 15:00

Artitgels legids il pli savens