Pervi dals dis d'avrigl fitg chauds èn bleras culturas gia stadas vi da flurir, quai ha scrit l'assicuranza svizra cunter tempesta. Il collaps da temperatura sut il punct da schelira haja laschà schelar las fluras en blers lieus.
Surtut en la regiun da Genevra haja quai dà gronds donns da schelira tar las vignas pervi da las notgs serainas, ha l'assicuranza communitgà. Enfin la fin da l'emna sajan vegnids annunziads en tut 370 donns da schelira vida culturas assicuradas da fritga e viticultura. Quai correspundia ad ina surfatscha da passa 700 hectaras.
Var 85% dals manaschis assicurads cunter schelira a Genevra e 40% en il Vallais han annunzià in donn.
La naiv fin en la Bassa haja era donnegià la pastgira. Sut la chargia da la naiv possia il pastg rumper giu, uschia che la racolta vegnia ad esser pli pauc. En tut sajan vegnids annunziads tar l'assicuranza 800 donns da la chargia da naiv en l'entira Bassa ed en las Prealps. Pertutgadas sajan culturas da graun, ravun e pastgiras sin ina surfatscha da passa 5'500 hectaras.
Adattà al tema
Il fraid n'è betg mo fitg dischagreabel per las plantas. Las temperaturas bassas pon chaschunar donns serius. Er en il Grischun èn ils pomiculturs e viticulturs sa fatgs quitads.
