Siglir tar il cuntegn

Svizra Verds vulan prender nov chatsch

Suenter las sconfittas en las elecziuns chantunalas da las davosas emnas, vulan ils Verds prender chatsch da nov.

Las co-presidentas dals Verds, Adèle Thorens (san.) e  Regula Rytz
Legenda: Las co-presidentas dals Verds, Adèle Thorens (san.) e Regula Rytz sa drizzan vers ils delegads a Renens. Keystone

Il nausch resultat en il chantun Turitg haja dà in stausch en la partida, ha la co-presidenta dals Verds Regula Rytz ditg. Tar las elecziuns naziunalas da l'atun giaja quai per la midada da l'energia, per il clima e per la natira, ha ditg la segunda co-presidenta Adèle Thorens.

Mobilisar bain

«Nus n’ans vulain betg inventar da nov e na stuain era betg, nagina partida politisescha pli datiers da la basa che nus, era betg quella che sa numna partida populara», ha Rytz punctuà. Per l’ina veglian ins metter las fermezzas ed ils success dals Verds en ina buna glisch. Per l’autra possian ins be prender nov chatsch sch’ils commembers e simpatisants mobiliseschian bain fin tar las elecziuns da l’atun.

4 giadas gea per ils 14 da zercladur

Per las votaziuns dals 14 da zercladur han ils Verds decidì 4 giadas la parola gea. Grondas maioritads han gì las iniziativas per ina taglia d'ierta e per stipendis e resultats pro hai era dà per la nova lescha da radio e televisiun e per la diagnostica da preimplantaziun.

RR novitads 15:00