«La PLD ha quità per la natira», «La PPS fa politica ecologica» - cun tals slogans fan actualmain reclama era las partidas da la dretga el cumbat electoral actual. «Tut be empermischuns vidas», din ils represchentants da l'Allianza per l'ambient (cun il WWF, Greenpeace, Pro Natura e VCS).
In’analisa verda
L’allianza ha analisà il cumportament da vuschar en connex cun dumondas d'ambient dals politichers en il parlament durant l'ultima legislatura. E lur resultats na laschan betg bleras dumondas avertas. En in rating preschenta l'Allianza per l'ambient, tge politichers che vuschan il pli verd e tgenins che vuschan il pli savens cunter interess da la natira.
La davosa plazza per la PPS
En dumondas politicas d'ambient è il PPS in "problem ecologic". Quai concluda l'Allianza per l'ambient suenter avair analisà las votaziuns en il parlament, cun resguardar 48 affars che pertutgan l'ambient. En 9 da 10 cas han ils commembers da la PPS vuschà cunter ils interess da la natira e da las organisaziuns che s'engaschan per la natira. En il rating da tut ils parlamentaris occupan ils commembers da la PPS uschia cleramain las ultimas plazzas.
La PLD na survegn era betg ina buna nota
Ed era tar la PLD è l'amur per la natira be scritta en lur slogans. En 3 quarts da las votaziuns han ils commembers da la PLD vuschà cunter ils interess da l'ambient. En tscherts cas discurra Thomas Vellacott, il CEO da WWF Svizra, perfin da "greenwashing". “Quai vul dir ch’in politicher sa venda spezialmain verd, bain savend che quai sa lascha vender bain tar ils electurs. En la realitad tar las votaziuns en il parlament però, vuscha el cunter l’interess da la natira.
Verds e socialdemocrats davanttiers
Las meglras notas en il rating han survegnì, senza surpraisa, ils commembers dals Verds e da la PS. Ed era la Partida verdliberala mussa, ch’ina politica per l'economia na sto betg esser ina cunter l'ambient. En il resultat total arriva la PVL sin plazza 3, vuschond en media en 96% dals cas per l'ambient.
Las partidas dal center
Pli variada daventa la situaziun tar las partidas dal center. La PBD sco era la PCD han adina puspè empruvà da sa profilar sco partidas che s'engaschan per l'ambient e per la midada sin il sectur da l’energia. E tge di il reality-check? Il spectrum gist tar la PCD è enorm vast. El tanscha d'ina Barbara Schmid-Federer che decida en sur 80% da las votaziuns per l'ambient, ed in Daniel Fässler che fa quai be en radund 20% da las votaziuns.
Differenza tranter dunnas ed umens
Per Thomas Vellacott èsi cler: “Sch’ins vul vuschar per ina politica per l’ambient , èsi da vuschar tar las partidas dal center per singulas testas. Far la segira pon ins cun eleger ils verds, ils verd-liberals u la PS.” Generalmain, mussa il rating da l'Allianza per l'ambient, vuschan parlamentarias pli savens per la natura (72% dals cas) sco lur collegas masculins (44% dals cas).
In’elecziun d’orientaziun
Per ils exponents da l'Allianza per l'ambient sa tracti quest onn d'ina vaira elecziun d'orientaziun per l'ambient. Dossiers sco la midada sin il sectur da l’energia, la politica dal clima, ma era la politica agrara e quella da la biodiversitad hajan gì gia durant ils ultims 4 onns success be grazia a pitschnas maioritads, mintgatant perfin be pervi da singulas vuschs. Thomas Vellacottl precisescha: “Quest onn na pon ins betg far insatge meglier per l'ambient, che da vuschar ecologicamain cumpatibel.”
Ils cussegliers grischuns
Ils 5 represchentants dal Grischun en il Cussegl naziunal spievlan relativamain bain quests resultats. Uschia ha Silva Semadeni da la PS vuschà durant l'ultima legislatura en 100% dals cas a moda ecologica. Josias Gasser da la Partida verd-liberala en 97,8% dals cas, Hansjörg Hassler da la PBD en 64,8% dals cas e Martin Candinas da la PCD en 57,3% dals cas. Il Gion davos è cleramain Heinz Brand da la PPS, el ha vuschà be en 11,7% da las votaziuns a moda ecologica.
Ed ils ulteriurs chantuns ...
En il congual interchantunal fa il chantun Grischun en relaziun ina buna figura, el è sin la quarta plazza. En congual cun autras regiuns perifericas sco il Tessin han ils parlamentaris grischuns vuschà en media pli ecologic, numnadamain en 66% dals cas a moda ecologica, en il Tessin be en 31% dals cas.
Il rating cumplet tenor partida, chantun, schlattaina etc. è da chattar sin www.umweltrating.ch.