Siglir tar il cuntegn
cuntegn

Svizra Uvestgs drovan las dunnas

Ils uvestgs da Basilea, Cuira e Son Gagl han preschentà a Turitg il nov concept e la nova redacziun da la Schweizerische Kirchenzeitung SKZ, la Gasetta ecclesiastica svizra.

Uvestg Vitus Huonder surdat a la manadra da la nova redacziun Maria Hässig in rispli.
Legenda: Uvestg Vitus Huonder surdat a la manadra da la nova redacziun Maria Hässig in rispli che simbolisescha la nova gasetta. RTR, Maria Victoria Haas

A partir dal schaner 2018 èn trais dunnas responsablas per la redacziun da la gasetta: la teologa Maria Hässig (mainaredacziun), la teologa Rosmarie Schärer e la schurnalista rumantscha Brigitte Burri.

Gasetta duai daventar pli attractiva

Il nov concept prevesa da tematisar il vast spectrum d'opiniuns dals uvestgs da la Svizra tudestga, las diversas posiziuns a l'intern da la baselgia catolica e da promover il dialog. Plinavant duai la gasetta s'orientar pli fitg a la pratica. Cun quest concept vul la gasetta daventar pli attractiva, da nov era per scolastas e scolasts da religiun e per represchentants da las plaivs.

La Gasetta ecclesiastica svizra publichescha dapi il 1832 artitgels davart teologia e pastoraziun ed è il fegl uffizial da las diocesas Basilea, Cuira, Son Gagl e per tut ils cartents da lingua tudestga da las diocesas Lausanne-Genevra-Friburg e Sion.