Siglir tar il cuntegn
Inhalt

Svizra Uss na vegn betg mo pli observà cun il spievel lung

Tar suspect d'abus duai l'Assicuranza d'invaliditad en futur betg mo observar persunas mabain er survegliar ellas cun apparats da GPS. Dentant duai in derschader lubir la surveglianza.

Spievels lungs.
Legenda: Uss na vegn betg pli mo observà cun il spievel lung. (maletg simbolic) Keystone

La Chombra pitschna ha approvà quest project da votaziun da sia cumissiun sociala. Dasper registraziuns da tun e maletg dastga l'Assicuranza d'invalids (AI) en futur damai er far diever dad instruments per definir la posiziun d'ina persuna. Quai dentant mo cun ina lubientscha d'in derschader.

Tals meds èn normalmain mo lubids per autoritads da persecuziun e servetschs d'infurmaziuns.

Maximalmain 30 dis

Tenor il Cussegl dals chantuns duain ins far diever da questas mesiras sch'ì dettia indizis concrets ch'ina persuna retiria u provia da retrair prestaziuns illegalmain. Ordinar ina observaziun po ina persuna cun posiziun da direcziun tar l'assicuranza. Plinavant ha la Chombra pitschna fixà ina limita per l'observaziun: Ins duai mo observar ils suspectads durant maximalmain 30 dis entaifer sis mais. E la durada possia maximalmain vegnir prolungada per sis ulteriur mais.

Ussa decida la Chombra gronda davart il project da votaziun. Instradà è il project vegnì pervia d'ina sentenzia dal Tribunal europeica dals dretgs umans. Il tribunal aveva constatà che la Svizra n'haja nagina basa giuridica per far observaziun d'assicurads.

RR novitads 16:00