Il Cussegl naziunal ha refusà ina proposta da Thomas Aeschi (PPS Zug) da tractar la fatschenta en trais pass, quai cun 129 cunter 54 vuschs. Aeschi aveva proponì da sulettamain auzar la vegliadetgna da renta da las dunnas sin 65 onns. Pir pli tard dueva suandar il sbassament da la tariffa da conversiun ch’influenzescha las rentas da las cassas da pensiun. Ed anc pli tard avess la decisiun duì succeder, sin tge via auzar la vegliadetgna da renta sin 67 onns.
I dovra ina refurma
En la debatta d’entrada ha ditg il pledader da la cumissiun predeliberanta Thomas Weibel, ch’i dovria refurmas da la prevenziun per la vegliadetgna. Dapi 20 onns na saja sa midà nagut. Dentant i dovria ina refurma faira, ha manegià Christine Häsler, la pledadra da la partida verda. E da quai sajan ins anc lunsch davent.
Ina debatta cun diras nuschs
Ils puncts ils pli dispitaivels da la debatta dals proxims dis vegnan ad esser, il frain a l'indebitament per la AVS, il supplement da la renta da 70 francs ch'il Cussegl dals chantuns a decidì ed in augment da las rentas per conjugals.
RR novitads 18:00/20:00